Italy :  वाढती महागाई, अपुरे वेतन आणि जीवनावश्यक खर्चात होणारी वाढ याविरोधात युरोपातील नागरिक रस्त्यावर उतरले आहेत. इटली आणि फ्रान्समधील प्रमुख शहरांमध्ये मोठ्या प्रमाणावर निदर्शने करण्यात आली. काही ठिकाणी या आंदोलनांना हिंसक वळण लागल्याने आंदोलक आणि पोलिसांमध्ये संघर्ष झाला.

इटलीतील मिलान, बोलोन्या आणि ट्यूरिन या शहरांमध्ये परिस्थिती तणावपूर्ण बनली असल्याचे सांगण्यात येत आहे. या हिंसाचारावर इटलीच्या पंतप्रधान जॉर्जिया मेलोनी यांनी नाराजी व्यक्त करत, शांततापूर्ण आंदोलनाचा अधिकार मान्य असला तरी हिंसाचार खपवून घेतला जाणार नसल्याचा आंदोलकांना इशारा दिला आहे.

मिलान, बोलोन्यामध्ये दगडफेक; रेल्वे स्थानक काही काळ बंद Italy :  
‘इटली इन द स्क्वेअर’ समितीच्या नेतृत्वाखाली विद्यार्थी आणि नागरिकांनी मोर्चा काढला होता. मिलानमधील पियाझा डुओमो परिसरात काही आंदोलकांनी दुकानांच्या काचा फोडल्या, बांधकाम प्रकल्पाला आग लावली आणि पोलिसांच्या दिशेने फटाके फेकले. परिस्थिती नियंत्रणात आणण्यासाठी पोलिसांनी कारवाई केली. या प्रकरणात ५० हून अधिक जणांना ताब्यात घेण्यात आले, तर १२ जण जखमी झाल्याचे वृत्त आहे.

बोलोन्या याठिकाणी मुख्य रेल्वे स्थानकावरही तणाव निर्माण झाला. चेहरा झाकलेल्या काही तरुणांनी सुरक्षा दलांच्या दिशेने बाटल्या, स्मोक बॉम्ब आणि लोखंडी बॅरिकेड्स फेकल्याचे सांगण्यात आले. यानंतर पोलिसांनी अश्रुधूर आणि वॉटर कॅननचा वापर केला.

खबरदारीचा उपाय म्हणून रेल्वे स्थानक काही काळ बंद ठेवण्यात आले. दरम्यान, ट्यूरिनमध्ये काचा फोडण्यासाठी वापरता येतील असे हातोडे आणि दगड घेऊन फिरणाऱ्या काही संशयितांना पोलिसांनी ताब्यात घेतल्याची माहिती समोर आली आहे.

‘हिंसाचार खपवून घेतला जाणार नाही’; मेलोनी यांचा विरोधकांना इशारा
इटलीच्या पंतप्रधान जॉर्जिया मेलोनी यांनी सोशल मीडिया प्लॅटफॉर्म ‘एक्स’वरून आंदोलनांबाबत भूमिका मांडली. शांततेच्या मार्गाने निदर्शने करणाऱ्या नागरिकांचा आणि कामगार संघटनांचा आदर असल्याचे त्यांनी स्पष्ट केले. मात्र, आंदोलनाच्या नावाखाली शहरांमध्ये तोडफोड करणे, सार्वजनिक मालमत्तेचे नुकसान करणे आणि पोलिसांवर हल्ले करणे स्वीकारले जाणार नसल्याचे त्यांनी म्हटले.

या हिंसाचाराचा विरोधी पक्षांनीही स्पष्ट शब्दांत निषेध करावा, असे आवाहन मेलोनी यांनी केले. अशा घटनांवर राजकीय पक्षांनी मौन बाळगणे योग्य नसल्याची भूमिका त्यांनी मांडली.

आरोग्य, शिक्षण आणि वेतनाच्या मुद्द्यांवरून नागरिकांचा संताप
इटलीतील आंदोलनामागे सार्वजनिक आरोग्य सेवांसाठी अपुरा निधी, सरकारी शाळांची स्थिती आणि वाढत्या महागाईच्या तुलनेत वेतनात अपेक्षित वाढ न होणे, ही प्रमुख कारणे असल्याचे वृत्त आहे. दैनंदिन खर्च भागवताना सर्वसामान्य नागरिकांना अडचणींचा सामना करावा लागत असल्याने सरकारच्या आर्थिक धोरणांविरोधातील नाराजी वाढत असल्याचे सांगितले जात आहे.

फ्रान्समध्ये ५.५ लाख नागरिक रस्त्यावर; ४०० हून अधिक जणांना अटक Italy :  
इटलीसोबतच फ्रान्समध्येही महागाई आणि आर्थिक धोरणांविरोधात मोठ्या प्रमाणावर निदर्शने झाली. राजधानी पॅरिससह देशातील विविध शहरांमध्ये सुमारे ५.५ लाख नागरिक रस्त्यावर उतरल्याचे वृत्त आहे. राष्ट्राध्यक्ष इमॅन्युएल मॅक्रॉन आणि त्यांच्या सरकारच्या आर्थिक धोरणांविरोधात आंदोलकांनी नाराजी व्यक्त केली.

फ्रान्सचे गृहमंत्री लॉरेंट नुनेझ यांनी दिलेल्या माहितीनुसार, विविध ठिकाणी आंदोलक आणि सुरक्षा दलांमध्ये संघर्ष झाल्यानंतर देशभरात ४०० हून अधिक जणांना अटक करण्यात आली. इटली आणि फ्रान्समधील या आंदोलनांमुळे वाढती महागाई, वेतनातील तफावत आणि सार्वजनिक सेवांवरील खर्च हे मुद्दे पुन्हा ऐरणीवर आले आहेत. मात्र, आंदोलनांदरम्यान झालेल्या हिंसाचारामुळे संबंधित सरकारांसमोर कायदा-सुव्यवस्था राखण्याचेही मोठे आव्हान निर्माण झाले आहे.