रांजणगाव गणपती : रांजणगाव औद्योगिक वसाहतीतील प्रदूषणाचा प्रश्न पुन्हा एकदा ऐरणीवर आला असून, औद्योगिक क्षेत्रातून बाहेर पडणाऱ्या दूषित पाण्यामुळे शेतकऱ्यांच्या पिकांचे नुकसान होत असल्याच्या तक्रारी समोर येत आहेत. शेतीसाठी वापरल्या जाणाऱ्या पाण्याच्या गुणवत्तेवरच प्रश्नचिन्ह निर्माण झाल्याने शेतकरी चिंतेत आहेत. एकीकडे औद्योगिक विकासाचा गाजावाजा तर दुसरीकडे प्रदूषणाचा फटका शेतकऱ्यांना बसत असल्याने महाराष्ट्र प्रदूषण नियंत्रण मंडळाच्या कार्यक्षमतेबाबत प्रश्न उपस्थित होत आहेत.

रांजणगाव औद्योगिक वसाहतीमध्ये विविध उद्योग कार्यरत असून, औद्योगिक सांडपाण्याची योग्य प्रक्रिया करूनच त्याची विल्हेवाट लावणे आवश्यक आहे. मात्र, दूषित पाण्यामुळे शेतीचे नुकसान होत असल्याच्या तक्रारींमुळे सांडपाणी व्यवस्थापन आणि प्रदूषण नियंत्रणाच्या उपाययोजनांची प्रत्यक्षात कितपत अंमलबजावणी होते, याची तपासणी करण्याची गरज निर्माण झाली आहे.

शेतीसाठी पाणी हा महत्त्वाचा घटक आहे. मात्र, त्याच पाण्यात दूषित घटक मिसळत आहे. पिकांच्या वाढीवर आणि उत्पादनावर विपरीत परिणाम होत आहे. या दूषित पाण्यामुळे पिके जळाल्याचा आरोप शेतकऱ्यांकडून केला जात आहे. संबंधित क्षेत्रातील पाण्याचे नमुने घेऊन त्यांची प्रयोगशाळेत तपासणी करणे आवश्यक आहे.

शेतकरी वर्षभर मेहनत करून पिके उभी करतात. बियाणे, खते, औषधे, मजुरी आणि पाण्यासाठी मोठा खर्च करावा लागतो. अशा परिस्थितीत प्रदूषणामुळे पिकांचे नुकसान झाले, तर शेतकऱ्यांना आर्थिक संकटाचा सामना करावा लागतो. त्यामुळे या प्रकरणाकडे केवळ पर्यावरणाचा प्रश्न म्हणून न पाहता शेतकऱ्यांच्या उपजीविकेशी संबंधित गंभीर विषय म्हणून पाहण्याची आवश्यकता आहे.

कारवाईची मागणी

संबंधित उद्योगांच्या सांडपाण्याचे नमुने, शेतातील पाण्याची गुणवत्ता आणि मातीची तपासणी करून प्रदूषणाचा स्रोत निश्चित करावा. नियमांचे उल्लंघन आढळल्यास संबंधितांवर कायद्यानुसार कारवाई करावी, अशी मागणी शेतकरी वर्गातून होत आहे.