IND vs SL Asian Games : आशियाई क्रीडा स्पर्धा २०२६ मध्ये भारतीय क्रिकेट संघाने दमदार कामगिरी करत अंतिम फेरीत प्रवेश केला आहे. उपांत्य फेरीच्या सामन्यात भारताने श्रीलंकेचा तब्बल १२४ धावांनी पराभव करत सुवर्णपदकाच्या सामन्यात धडक मारली.

आता अंतिम सामन्यात भारताचा सामना पारंपरिक प्रतिस्पर्धी पाकिस्तानशी होणार असल्याने या सामन्याकडे क्रिकेटप्रेमींचे विशेष लक्ष लागले आहे. श्रीलंकेविरोधातील उपांत्य सामन्यात भारताने प्रथम फलंदाजी करताना २० षटकांत ७ गडी गमावून १६९ धावा केल्या.

भारताच्या सुरुवात मात्र अडखळत झाली. अभिषेक शर्मा आणि संजू सॅमसन प्रत्येकी ७ धावांवर बाद झाले, तर तिलक वर्माला केवळ २ धावा करता आल्या. अक्षर पटेल ८, शिवम दुबे ३ आणि कर्णधार श्रेयस अय्यर १३ धावांवर माघारी परतले.

मात्र, इशान किशनने चमकदार कामगिरी केली. त्याने नाबाद ८० धावांची तुफानी खेळी करत डाव सावरला. त्याला सलामीवीर वैभव सूर्यवंशीची चांगली साथ मिळाली. वैभवने अवघ्या २१ चेंडूंमध्ये ३८ धावा करताना ६ चौकार आणि २ षटकार लगावले.

भारताने दिलेल्या १७० धावांच्या आव्हानाचा पाठलाग करताना श्रीलंकेच्या फलंदाजांना भारतीय गोलंदाजांसमोर फार काळ टिकाव धरता आला नाही. जसप्रीत बुमराह आणि अक्षर पटेल यांच्या अचूक आणि भेदक गोलंदाजीसमोर श्रीलंकेचा डाव अक्षरशः कोलमडला.

अवघ्या दोन षटकांत श्रीलंकेने तीन विकेट गमावल्याने सामन्यावर भारताची पकड आणखी मजबूत झाली. जसप्रीत बुमराहने आपल्या षटकाच्या दुसऱ्याच चेंडूवर सिनेथ जयवर्धनेला माघारी पाठवले. त्यानंतर षटकाच्या पाचव्या चेंडूवर सोहन डी लिवेराची विकेट घेतली.

विशेष म्हणजे, या दोन्ही फलंदाजांना खातेही उघडता आले नाही. यानंतर दुसरे षटक टाकण्यासाठी अक्षर पटेल गोलंदाजीला आला. त्याच्या षटकाच्या पहिल्याच चेंडूवर नुवानिंदू फर्नांडो धावबाद झाला. त्यामुळे श्रीलंकेची सुरुवात अत्यंत खराब झाली आणि भारतीय गोलंदाजांनी सुरुवातीपासूनच सामन्यावर वर्चस्व मिळवले.

भारताने प्रथम फलंदाजी करत श्रीलंकेसमोर १७० धावांचे लक्ष्य ठेवले होते. मात्र, या लक्ष्याचा पाठलाग करताना श्रीलंकेच्या फलंदाजांना मोठी भागीदारी उभारता आली नाही. भारतीय गोलंदाजांनी सातत्याने दबाव कायम ठेवत श्रीलंकेच्या फलंदाजीची कोंडी केली.

श्रीलंकेकडून सहन अराचिगे आणि थिरिंदू रत्नायके यांनी प्रत्येकी दोन विकेट घेतल्या. मात्र, भारतीय फलंदाजांनी उभारलेल्या आव्हानाला श्रीलंकेचा संघ गवसणी घालू शकला नाही. अखेर भारताने तब्बल १२४ धावांनी दणदणीत विजय मिळवत अंतिम फेरीत प्रवेश निश्चित केला.

दरम्यान, उपांत्य फेरीत पाकिस्तानने बांगलादेशचा पराभव करून फायनलमध्ये प्रवेश केला आहे. त्यामुळे ३ ऑक्टोबर रोजी भारत आणि पाकिस्तान यांच्यात सुवर्णपदकासाठी महामुकाबला रंगणार असून, या अंतिम सामन्याकडे क्रिकेटप्रेमींचे विशेष लक्ष लागले आहे.

International Coffee Day 2026: कॉफीप्रेमींनो, जरा सावध! कॉफी पिताना होणाऱ्या ‘या’ 7 चुका टाळा