ग्वाल्हेर :– शेष भारत संघाचा फलंदाज यशस्वी जैस्वालने इराणी करंडकातील पदार्पणाच्या सामन्यात इतिहास रचला आहे. मध्य प्रदेश विरुद्धच्या सामन्यात यशस्वीने पहिल्या डावातील द्विशतकासह दुसऱ्या डावातही शतक झळकाविण्याचा पराक्रम केला आहे. यासह इराणी करंडकाच्या एकाच सामन्यात द्विशतक आणि शतक झळकावणारा यशस्वी हा पहिला भारतीय खेळाडू ठरला आहे. शेष भारतचा दुसरा डाव आटोपल्यानंतरही चौथ्या दिवस अखेर त्यांच्याकडे तब्बल 356 धावांची आघाडी आहे. जैस्वालने मध्य प्रदेश विरुद्ध पहिल्या डावात द्विशतक झळकावून संघाची धावसंख्या 400 च्या जवळ नेली होती. अशाप्रकारे या सामन्यात यशस्वी 300 हून अधिक धावा पूर्ण करताना इराणी करंडकात अशी कामगिरी करणारा दुसरा फलंदाज ठरला आहे. याआधी भारताचा सलामीवीर शिखर धवनने इराणी करंडकात एका सामन्यात 300 धावांचा टप्पा पार केला होता. 21 वर्षीय यशस्वीने पहिल्या डावात द्विशतक झळकावले या स्पर्धेत अशी कामगिरी करणारा तो सर्वात तरुण फलंदाज देखील ठरला. यापूर्वी हा विक्रम प्रवीण आमरे यांच्या नावावर होता, ज्यांनी 1990 मध्ये वयाच्या 22 व्या वर्षी द्विशतक झळकावले होते. चौथ्या दिवशीही यशस्वी भवः 21 वर्षीय फलंदाज यशस्वी जैस्वालची बॅट चौथ्या दिवशीही जोरदार तळपली आहे. यशस्वीने 103 चेंडूत 13 चौकार आणि 1 षटकाराच्या मदतीने 100 धावा पूर्ण केल्या. लंच टाइमपर्यंत यशस्वीने 132 चेंडूत 15 चौकार आणि दोन षटकारांच्या मदतीने 91.66 च्या स्ट्राइक रेटने 121 धावा केल्या आहेत. पहिल्या डावातही जैस्वालने 259 चेंडूत 82.33 च्या स्ट्राईक रेटने 213 धावा केल्या होत्या. तर दुसरीकडे शेष भारतचा कर्णधार मयंक अगरवाल पुन्हा एकदा अपयशी ठरला. दुसऱ्या डावात चार चेंडू खेळणारा मयंक शून्यावर बाद झाला. मध्य प्रदेशसमोर खडतर आव्हान सुमार कामगिरीमुळे मध्य प्रदेशचा पहिला डाव 394 धावांत आटोपला. दुसऱ्यांदा गोलंदाजी करताना शुभम शर्मा व अंकित कुशावाह यांनी प्रत्येक दोन फलंदाज बाद करताना शेष भारतला 246 धावांवर रोखले. दुसऱ्यांदा फलंदाजी करणाऱ्या “एमपी’ची सुरुवात खराब झाली असून हिमांशू मंत्रीने संघाचा डाव सावरला आहे; परंतु अद्यापही विजयासाठी तब्बल 396 धावांचे आव्हान असणाऱ्या मध्य प्रदेशसमोर खडतर असणार आहे. संक्षिप्त धावफलकः शेष भारत ः पहिला डावः 121 षटकांत सर्वबाद 484; मध्य प्रदेश ः पहिला डावः 112.5 षटकांत सर्वबाद 294; शेष भारत ः दुसरा डाव ः 71.3 षटकांत सर्वबाद 246 (यशस्वी जैस्वाल 144, उपेंद्र यादव 30; शुभम शर्मा 2-9, अंकित कुशावाह 2-44); मध्य प्रदेश ः दुसरा डाव ः 29 षटकांत 2 बाद 81 (हिमांशू मंत्री 51 खेळत आहे, हर्ष गवळी 15 खेळत आहे; मुकेश कुमार 1-16, सौरभ कुमार 1-20).
