Iran US Negotiations: पाकिस्तानची राजधानी इस्लामाबाद येथे अमेरिका आणि इराण यांच्यात २१ तास तीव्र चर्चा होऊनही, कोणताही करार होऊ शकला नाही, म्हणजेच ही चर्चा अनिर्णित राहिली. या चर्चेकडे सर्व जगाचे लक्ष लागले होते मात्र ही चर्चा फिस्कटल्याची माहिती आता समोर येत आहे. अमेरिकेचे उपराष्ट्रपती जे. डी. व्हान्स यांनी इस्लामाबादमधील माध्यमांशी बोलताना, “आम्ही याठिकाणी मोकळ्या मनाने आलो होतो, पण आता आम्ही कोणत्याही कराराशिवाय अमेरिकेला परत जात आहोत.”असे म्हणत चर्चेची माहिती दिली. तर दुसरीकडे इराणच्या सरकारी वृत्तसंस्थेने, “अमेरिकेच्या अवाजवी मागण्यांमुळे एक समान चौकट आणि करार होण्यास अडथळा निर्माण झाला” असे म्हणत शांती चर्चेवर प्रतिक्रिया दिली. Iran US Negotiations: दरम्यान, पत्रकार परिषदेत व्हान्स यांनी, “चांगली बातमी ही आहे की आम्ही इराणी लोकांशी अनेक मुद्द्यांवर अर्थपूर्ण चर्चा केली आहे. वाईट बातमी ही आहे की आम्ही कोणत्याही करारावर पोहोचलो नाही. आणि मला वाटते की ही बातमी अमेरिकेपेक्षा इराणसाठी अधिक वाईट आहे.”असे म्हणत त्यांनी इराणला सूचक इशारा दिला. व्हान्स यांनी यावेळी आपला “अंतिम आणि सर्वोत्तम प्रस्ताव” सादर केला होता, परंतु इराणने सध्या अमेरिकेच्या अटी स्वीकारण्यास नकार दिला आहे. व्हान्स यांनी कठोरपणे सांगितले की अमेरिकेने आपल्या “रेड लाईन्स” (अंतिम मर्यादा) स्पष्ट केल्या आहेत. Iran US Negotiations: ते म्हणाले, “आम्ही कोणत्या गोष्टींवर तडजोड करू शकतो आणि कोणत्या गोष्टींवर अजिबात करू शकत नाही, हे आम्ही स्पष्ट केले आहे. इराणी शिष्टमंडळाने आमच्या अटी न स्वीकारण्याचा निर्णय घेतला आहे.” जेव्हा अमेरिकेच्या उपराष्ट्रपतींना विचारण्यात आले की इराणी कोणत्या गोष्टींना सहमत नाहीत, तेव्हा ते म्हणाले, “मी जास्त तपशिलात जाणार नाही, कारण मला २१ तासांच्या खाजगी संभाषणातील तपशील सार्वजनिक करायचा नाही. पण वस्तुस्थिती ही आहे की, आम्हाला त्यांच्याकडून अशी वचनबद्धता हवी आहे की ते अण्वस्त्रे मिळवण्याचा प्रयत्न करणार नाहीत किंवा असे पर्याय शोधणार नाहीत ज्यामुळे त्यांना तात्काळ अण्वस्त्रे मिळवता येतील.” ते पुढे म्हणाले, “वाटाघाटींमध्ये ज्या काही उणिवा होत्या, त्या पाकिस्तानींमुळे नव्हत्या. त्यांनी उत्कृष्ट काम केले आणि आमच्या व इराणींमधील दरी कमी करण्यासाठी आणि आम्हाला करारापर्यंत पोहोचण्यास मदत करण्यासाठी खरोखरच सर्वतोपरी प्रयत्न केले.” Iran US Negotiations: या चर्चेतील अमेरिकेची सर्वात प्रमुख आणि कठोर अट अण्वस्त्रांसंबंधी होती. अमेरिकेचे म्हणणे आहे की, त्यांना अशी हमी हवी आहे की इराण भविष्यात कधीही अण्वस्त्रे विकसित करण्याचा प्रयत्न करणार नाही. अमेरिकेने आग्रह धरला की ते आपल्या बाजूने लवचिक राहिले होते आणि त्यांनी एक “साधा प्रस्ताव” व “परस्पर सामंजस्याचा मार्ग” देऊ केला होता, परंतु अणुसुरक्षेवर कोणतीही तडजोड झाली नाही.
