तेल अविव : अमेरिकेने इराणच्या अणू केंद्रांवर हल्ले केल्यानंतर प्रतिक्रिया म्हणून इराणने इस्रायलमधील हल्ल्यांमध्ये वाढ केली आहे. इराणने इस्रायलवर क्षेपणास्त्रांचा मारा केल्याने किमान ११ जण जखमी झाले आहेत. इराणी क्षेपणास्त्रे तेल अवीव, हैफा, नेस झिओना आणि रिशोन लेझिओन क्षेत्रासह मध्य आणि उत्तर इस्रायलच्या काही भागांवर आदळली तेव्हा धोक्याचे सायरन वाजवले गेले आणि स्फोटांचे आवाज ऐकू आले. ही क्षेपणास्त्रे इराणमधून डागण्यात आली होती आणि क्षेपणास्त्रांना हवेतच नष्ट करण्यासाठी हवाई संरक्षण प्रणाली कार्यान्वित करण्यात आल्याचे इस्रायली सैन्यदलाने म्हटले आहे.

इराणकडून इस्रायलवर ३० क्षेपणास्त्रे डागण्यात आली आहेत. इराणने लक्ष्य केलेल्या ठिकाणांपैकी बेन गुरियन आंतरराष्ट्रीय विमानतळ देखील होता. इराणने इस्रायलवरील हल्ल्यांमध्ये सर्वात जास्त पेलोड वाहून नेण्यास सक्षम असलेल्या सर्वात मोठ्या क्षेपणास्त्राचा वापर केला आहे. इराणने डागलेल्या क्षेपणास्त्रांमध्ये खोरमशहर-४ चा समावेश आहे.

या क्षेपणास्त्राची पल्ला २,००० किमी आणि १,५०० किलोग्रॅम वॉरहेड असल्याचे इराणी रिव्होल्यूशनरी गार्ड कॉर्प्सकडून सांगितले जाते आहे, परंतु हे क्षेपणास्त्र अनेक वॉरहेड वाहून नेऊ शकते, असे इराणचे म्हणणे आहे. १९८० च्या दशकात इराक-इराण युद्धादरम्यान इराणमधील खोरमशहरात झालेल्या मोठ्या लढाईमुळे या शहराचे नाव या क्षेपणास्त्राला देण्यात आले आहे. याला खेबार असेही म्हणतात, ज्याचे नाव पुन्हा एका ज्यू किल्ल्यावरून ठेवण्यात आले आहे, हा किल्ला आता सौदीमध्ये आहे आणि ७ व्या शतकात ताब्यात घेण्यात आला होता.

3 ओलिसांचे मृतदेह इस्रायलने मिळवले
इस्रायली सैन्याला गाझा पट्टीत ठेवण्यात आलेल्या तीन ओलिसांचे अवशेष सापडले आहेत, असे इस्रायली लष्कराने रविवारी सांगितले. स्थानिक रुग्णालयाच्या म्हणण्यानुसार, मानवीय मदतीची वाट पाहत असताना इस्रायली हवाई हल्ल्यात किमान चार पॅलेस्टिनी ठार झाले आणि २२ जण जखमी झाले. लष्कराने हे अवशेष योनाटन समेरानो, २१; ओफ्रा केइदार, ७०; आणि शे लेव्हिन्सन, १९ यांचे असल्याचे ओळखले. हे तिघेही ७ ऑक्टोबर २०२३ रोजी हमासच्या हल्ल्यात मारले गेले होते. हमासच्या ताब्यात असलेल्या उर्वरित बंधकांना फक्त अधिक पॅलेस्टिनी कैद्यांच्या बदल्यात, कायमस्वरूपी युद्धबंदीच्या आणि गाझामधून इस्रायली माघारीच्या बदल्यात सोडतील, असे हमासने म्हटले आहे.