लखनौ – वेस्ट इंडिजचा स्फोटक फलंदाज काईल मायर्सने (Kyle Mayers) दिल्ली कॅपिटल्सविरुद्धच्या सामन्यात लखनौ सुपरजायंट्‌सकडून खेळताना एकना क्रिकेट स्टेडियमवर तब्बल 7 षटकारांचा पाऊस पाडला. सलामीवीर मायर्सने आपल्या खेळीत 2 चौकारही मारले. मायर्सच्या धडाकेबाज खेळीमुळेच लखनौ संघाने प्रथम फलंदाजी करताना 20 षटकांत 6 गडी गमावून 193 धावांपर्यंत मजल मारली.

Innings Break!@LucknowIPL post a mammoth total of 193/6 on board!

Are we in for a high-scoring thriller in Lucknow❓ Stay tuned!

Scorecard ▶️ https://t.co/086EqX92dA #TATAIPL#TATAIPL | #LSGvDC pic.twitter.com/X2KiXNp9pQ

— IndianPremierLeague (@IPL) April 1, 2023

या सामन्यात दिल्लीचा कर्णधार डेव्हिड वॉर्नरने नाणेफेक जिंकून प्रथम गोलंदाजी करण्याचा निर्णय घेतला. दिल्लीकडून गोलंदाजांनी चांगली सुरुवात करून लखनौ संघाचा कर्णधार के.एल. राहुलला 8 धावांवर पॅव्हेलियनमध्ये पाठवले. यानंतर लखनौच्या काईल मायर्सने दीपक हुडाच्या साथीने पहिल्या 6 षटकांत धावसंख्या 30 धावांपर्यंत नेली.

येथून मायर्सने आपल्या फलंदाजीत आक्रमकता घेत धावसंख्या वेगाने पुढे नेण्यास सुरुवात केली आणि दीपकच्याच साथीने दुसऱ्या विकेटसाठी 42 चेंडूत 79 धावांची शानदार भागीदारी केली. 17 धावा करून हुडा पॅव्हेलियनमध्ये परतला, तर मायर्सने 38 चेंडूत 2 चौकार आणि 7 षटकारांसह 73 धावांची खेळी केली. दिल्लीकडून या सामन्यात खलील अहमदने 2 तर चेतन, कुलदीप आणि अक्षर पटेल यांनी 1-1 बळी घेतले.

#IPL2023 : श्रीशांतच्या कानाखाली ते पंतचा No Ball वरुन मैदानावर मोठा ड्रामा; जाणून घ्या…. IPL इतिहासातील’11’ मोठे वाद

पूरन-पंड्याची फटकेबाजी

117 धावांपर्यंत 4 विकेट गमावलेल्या लखनौचा डाव संभाळत निकोलस पूरन आणि कृणाल पंड्या यांनी 5व्या विकेटसाठी 26 चेंडूत 48 धावांची जलद भागीदारी केली. पूरनने 21 चेंडूत 2 चौकार आणि 3 षटकारांच्या मदतीने 36 धावांची शानदार खेळी केली. तर पंड्याने 15 धावांची खेळी केली, तर आयुष बदोनीने अवघ्या 7 चेंडूत 18 धावांची खेळी करत धावसंख्या 190 च्या पुढे नेली.

रिषभ पंतची आठवण

दिल्ली-लखनौ सामना सुरू होण्यापूर्वी अपघातामुळे संघाबाहेर असलेला दिल्लीचा कर्णधार रिषभ पंतने ट्विट आपल्या संघाला शुभेच्छा दिल्या. “इम्पॅक्‍ट प्लेअरच्या नियमामुळे मी तुमच्या संघाचा 12वा खेळाडू होऊ शकत नाही, पण मी 13वा खेळाडू नक्कीच आहे,’ असे पंतने आपल्या ट्विटमध्ये म्हटले. त्याचवेळी संघ सहकाऱ्यांनी पंतची आठवण काढताना पंतची 17 नंबर असलेली जर्सी दिल्ली कॅपिटल्सच्या डगआऊटमध्ये लावलेली दिसली. काही दिवसांपूर्वी पंत भीषण कार अपघातातून थोडक्‍यात बचावला होता. पंत अपघातातून सावरत असल्याने दिल्ली संघाच्या नेतृत्वाची जबाबदारी डेव्हिड वॉर्नरच्या खांद्यावर देण्यात आली होती. तसेच दिल्ली संघाने यंदाच्या हंगामासाठी पंतच्या जागी युवा यष्टीरक्षक अभिषेक पोरेलला संघात संधी दिलेली आहे.

संक्षिप्त धावफलक –

लखनौ सुपर जायंट्‌स : 20 षटकांत 6 बाद 193 (काईल मायर्स 73, निकोलस पुरन 36, आयुष बदोणी 18; खलील अहमद 2-30, चेतन सकारिया 2-53, अक्‍सर पटेल 1-38, कुलदीप यादव 1-35)