मुंबई – नोव्हेंबर महिन्यात इक्विटी म्युच्युअल फंडामध्ये झालेली गुंतवणूक 21 टक्क्यांनी वाढून 29,911 कोटी रुपये इतकी झाली आहे. त्या अगोदर तीन महिन्यांमध्ये इक्विटी म्युच्युअल फंडातील गुंतवणूक शेअर बाजारातील अस्थिरतेमुळे कमी झाली होती. मात्र आता गुंतवणूकदारांचा शेअर बाजाराबाबत आशावाद वाढला असल्याचे दिसून येते. असोसिएशन ऑफ म्युच्युअल फंड्स इन इंडिया या संस्थेने जारी केलेल्या आकडेवारीनुसार, नोव्हेंबर महिन्यात झालेल्या गुंतवणुकीमुळे नोव्हेंबर महिन्यात म्युच्युअल फंडाच्या व्यवस्थापनाखालील एकूण मालमत्ता वाढून 80.80 लाख कोटी रुपये झाली आहे. ऑक्टोबरमध्ये ही रक्कम 79.87 लाख कोटी रुपये होती. ऑक्टोबर महिन्यामध्ये इक्विटी म्युच्युअल फंडात 24,690 कोटी रुपयांची गुंतवणूक झाली होती. नोव्हेंबर महिन्यामध्ये यात 21 टक्क्यांची वाढ झाली आहे. म्युच्युअल फंडाच्या सर्वच वर्गात गुंतवणूक वाढत असल्याचे दिसून येते. फ्लेक्सि कॅप फंडात नोव्हेंबर महिन्यामध्ये 8,135 कोटी रुपयांची गुंतवणूक झाली. या म्युच्युअल फंडामध्ये गुंतवणूक करण्याचा काही दिवसापासून जास्त ओढा असल्याचे दिसून येते. इक्विटी म्युच्युअल फंडातील गुंतवणूक वाढली असली तरी कर्जरोख्यासंदर्भातील म्युच्युअल फंडातील गुंतवणूक नोव्हेंबर महिन्यामध्ये वाढण्याऐवजी 25,692 कोटी रुपये काढून घेण्यात आले. ऑक्टोबर महिन्यात या क्षेत्रात झालेली गुंतवणूक तब्बल 1.6 लाख कोटी रुपये होती. त्यावेळी शेअर बाजारातील वातावरण खराब होते. नोव्हेंबर महिन्यामध्ये गोल्ड ईटीएफमध्ये गुंतवणूक कमी होऊन 3,742 कोटी रुपये झाले आहे. ऑक्टोबर महिन्यामध्ये या क्षेत्रात 7,743 कोटी रुपयांची गुंतवणूक झाली होती. शेअर बाजारातील परिस्थिती सुधारण्याची शक्यता वाढल्यामुळे या क्षेत्रातील गुंतवणूक कमी झाली आहे. नोव्हेंबर महिन्यात एसआयपीच्या माध्यमातून झालेली गुंतवणूक किंचित कमी होऊन 29,445 कोटी रुपये झाली आहे ऑक्टोबर महिन्यामध्ये ही रक्कम 29,631 कोटी रुपये होती.
