SEBI Big Update: सिक्युरिटीज अँड एक्सचेंज बोर्ड ऑफ इंडिया (सेबी) ने गुंतवणूकदारांच्या सुरक्षेसाठी एक महत्त्वपूर्ण पाऊल उचलले आहे. सर्व सेबी-नोंदणीकृत मध्यस्थांना (ब्रोकर, म्युच्युअल फंड हाऊसेस) आता नवीन UPI पेमेंट सिस्टम स्वीकारणे बंधनकारक असेल. हा सिस्टम १ ऑक्टोबर २०२५ पासून लागू होणार आहे. यामुळे गुंतवणूकदारांना फसव्या ॲप्स आणि सायबर फसवणुकीपासून संरक्षण मिळेल. सेबीचे अध्यक्ष तुहिन कांता पांडे म्हणाले, “अनेक गुंतवणूकदार खोट्या ब्रोकर आणि ॲप्सच्या जाळ्यात अडकून पैसे गमावतात. हा सिस्टम त्यांना सुरक्षित ठेवेल.”

या नव्या सिस्टमअंतर्गत ‘सेबी चेक’ नावाचे टूल लॉन्च होणार आहे, ज्यामुळे गुंतवणूकदार QR कोड स्कॅन करून किंवा UPI आयडी मॅन्युअली टाकून मध्यस्थाची खात्री करू शकतील. यात बँक खाते क्रमांक आणि IFSC कोडही तपासता येईल. सर्व नोंदणीकृत मध्यस्थांना QR कोड तयार करणे बंधनकारक असेल, ज्यामध्ये ‘थम्स-अप’ लोगो दिसेल, ज्यामुळे पेमेंट सुरक्षित आणि सोपे होईल.

सध्या सुरू असलेल्या SIP साठी विद्यमान पेमेंट पद्धती चालू राहतील, परंतु १ ऑक्टोबर २०२५ नंतरच्या नव्या आणि नूतनीकरण होणाऱ्या SIP साठी नवीन UPI आयडी वापरणे अनिवार्य असेल. सेबी गूगल प्ले स्टोअर आणि iOS ॲप स्टोअरशी संपर्क साधून केवळ सत्यापित ॲप्सच उपलब्ध असतील याची खात्री करत आहे. याशिवाय, पुढील दोन वर्षांत सेबी सायबर सुरक्षा आणि फसवणूक प्रतिबंधासाठी जागरूकता अभियान राबवणार आहे. या बदलामुळे गुंतवणूकदारांना सुरक्षित आणि पारदर्शी गुंतवणुकीचा विश्वास मिळेल.