धुळे : अवैध्यपणाने दारूची तस्करी करणारे लोक पोलिसांपासून बचाव करण्यासाठी काय नवीन शक्कल लढवतील हे सांगता येत नाही. कधी बॅगमध्ये, चप्पल मध्ये, कचऱ्याच्या गाडीमध्ये तर कधी चाऱ्याच्या गाडीमध्ये दारूची तस्करी केली जाते. मात्र आता चक्क सॅनिटरी पॅडच्या गोण्यांच्या माध्यमातून दारू तस्करी केल्याचा प्रकार समोर आला आहे. धुळे पोलिसांनी गोवा राज्यातून धुळे मार्गे गुजरातला सॅनिटरी पॅड घेऊन जाणाऱ्या आयशर ट्रकची तपासणी केली असता, हे प्रकरण उघडकीस आणले आहे. लाखो रुपयांचा बियर व दारू साठा जप्त केला असून या दारू तस्करांना धुळे पोलिसांकडुन अटक करण्यात आली आहे. या संपूर्ण प्रकाराबाबतची खात्रीशीर गोपनीय माहिती धुळे स्थानिक गुन्हे शाखेचे पोलीस निरीक्षक हेमंत पाटील यांना मिळाली. त्यानंतर तात्काळ मुंबई आग्रा महामार्गावरील आवधान शिवारात स्थानिक गुन्हे शाखेच्या पथकाने सापळा रचत संशयित आयशर ट्रक थांबवून त्यातील मालाबाबत विचारपूस केली. त्यावेळेस ट्रकमधील चालकाने आतमध्ये सॅनिटरी पॅडने भरलेल्या गोण्या असल्याचे सांगितले. मात्र पोलिसांना त्यांच्यावर संशय निर्माण झाला. त्यांनी आयशर ट्रकमधील मालाची तपासणी असता गाडीतील सॅनिटरी पॅडच्या गोण्यांखाली मोठ्या प्रमाणात बियर व विदेशी दारूचा मद्यसाठा आढळून आला. या आयशर ट्रक मध्ये ७ लाख ८१ हजार ८०० रुपये किमतीचे विदेशी दारूचे तब्बल २०५ खोके, ५२ हजार ८०० रुपये किमतीचे बियरचे २० खोके,१२,००० रुपयांचे सॅनिटरी पॅडच्या गोण्या असा एकूण १९ लाख ४४ हजार ६०० रुपये किमतीचा मुद्देमाल धुळे पोलिसांकडून ताब्यात घेण्यात आला आहे. दरम्यान, या संपूर्ण कारवाईचे धुळे जिल्हा पोलीस अधीक्षक संजय बारकुंड यांनी कौतुक केले असून या प्रकरणी दोन्ही आरोपींवर मोहाडी पोलीस ठाण्यात गुन्हा दाखल करण्यात आला आहे.
