प्रभात वृत्तसेवा
पुणे : महापालिकेतील कथित बनावट भरती रॅकेटची सखोल चौकशी करून दोषींवर कठोर कारवाई करावी, तसेच कोविड काळात सेवा बजावलेल्या आणि अनेक वर्षांपासून कार्यरत असलेल्या कंत्राटी कामगारांना थेट कायम सेवेत सामावून घेण्याचा निर्णय घ्यावा, अशी मागणी महाराष्ट्र नवनिर्माण सेनेचे शहर उपाध्यक्ष सुहास निम्हण यांनी केली आहे. याबाबतचे निवेदन महापालिका आयुक्त आणि सामान्य प्रशासन विभागाला देण्यात आले.

महापालिकेत बनावट नियुक्तीपत्रे, खोटे शिक्के, बनावट स्वाक्षऱ्या आणि पगारपत्रकांच्या माध्यमातून बेरोजगार तरुणांची फसवणूक होत असल्याचे वृत्त समोर आले असून, या प्रकरणातील संपूर्ण रॅकेट उघड करून संबंधितांवर कठोर कारवाई करावी, अशी मागणी निवेदनात करण्यात आली आहे.  (Pune News)

वर्षानुवर्षे कंत्राटी पद्धतीने काम करणाऱ्या कर्मचाऱ्यांचे आर्थिक शोषण होत असून, २५ वर्षांपासून कायम भरती न झाल्याने अनेक कुटुंबांचे मोठे नुकसान झाले आहे. विशेषतः कोरोना महामारीच्या काळात जीव धोक्यात घालून सेवा देणाऱ्या ‘कोविड योद्ध्यांना’ प्राधान्याने न्याय देऊन त्यांना कायम सेवेत सामावून घ्यावे, असेही मनसेने म्हटले आहे.

नव्याने महापालिकेत समाविष्ट झालेल्या ग्रामपंचायत कर्मचाऱ्यांप्रमाणेच अनुभवी कंत्राटी कर्मचाऱ्यांनाही कोणत्याही जाचक अटींशिवाय कायम सेवेत सामावून घेण्याचा धोरणात्मक निर्णय घ्यावा, अशी मागणी निवेदनात करण्यात आली आहे.

प्रशासनाने कंत्राटी कामगारांच्या प्रश्नावर तातडीने सकारात्मक निर्णय घ्यावा. अन्यथा मनसेच्या वतीने महापालिका आणि शहरभर आंदोलन छेडण्यात येईल, असा इशाराही सुहास निम्हण यांनी दिला आहे.