कोची (केरळ) : भारतीय नौदलाने आपल्या भात्यात आणखी एक तीर भरला आहे. आयएनएस इक्षक हे त्यांचे पहिले मोठे सर्वेक्षण जहाज आज कार्यान्वित करण्यात आले. नौदल प्रमुख ॲडमिरल दिनेश त्रिपाठी यांच्या उपस्थितीत हे जहाज कोची नौदल तळावर कार्यान्वित करण्यात आले. याप्रसंगी बोलताना नौदल प्रमुख ॲडमिरल दिनेश त्रिपाठी म्हणाले की, आयएनएस इक्षक सारख्या सर्वेक्षण जहाजे सुरक्षित नेव्हिगेशन सुनिश्चित करण्यासाठी महत्त्वपूर्ण आहेत. दक्षिण नौदल कमांडमध्ये तैनात होणारे पहिले जहाज म्हणून, इक्षक नौदलाची हायड्रोग्राफिक क्षमता वाढवेल. हे जहाज नौदलात सामील होणारे सर्वेक्षण जहाज (मोठ्या) वर्गाचे तिसरे जहाज आहे. इक्षक नावाचा अर्थ मार्गदर्शक आहे. त्याच्या नावाप्रमाणेच, आयएनएस इक्षक हे सर्व नौदल कर्मचाऱ्यांसाठी मार्गदर्शक आहे. ते भारताच्या विशाल सागरी क्षेत्रांचे मॅपिंग करण्यासाठी, खलाशांसाठी सुरक्षित मार्ग सुनिश्चित करण्यासाठी आणि भारताची सागरी शक्ती वाढवण्यासाठी समर्पित असेल. हे जहाज आधुनिक सर्वेक्षण आणि नेव्हिगेशन प्रणालींनी सुसज्ज आहे. अनपेक्षित खोल समुद्र आणि किनारी क्षेत्रांचे अचूक मॅपिंग करण्यास हे जहाज सक्षम असून सागरी नकाशांची अचूकता सुनिश्चित करते. हे हिमनगांसह पाण्याखालील अडथळे ओळखते आणि त्यांच्याभोवती सुरक्षित मार्ग तयार करण्यास मदत करते. हे जहाज अत्याधुनिक तंत्रज्ञानाने सुसज्ज आहे. ज्यामध्ये उच्च-रिझोल्यूशन मल्टी-बीम इको साउंडर सोनार सिस्टम, पाण्याखालील रोबोटिक पाणबुड्या, रिमोटली ऑपरेटेड वाहने आणि चार सर्वेक्षण मोटर बोटींचा समावेश आहे. हे जहाज कोलकाता येथील गार्डन रीच शिपबिल्डर्स अँड इंजिनिअर्स लिमिटेडने बांधले आहे. या युद्धनौकेची रचना नौदलाच्या जहाज उत्पादन संचालनालय आणि कोलकाता येथील युद्धनौका देखरेखी पथकाच्या देखरेखीखाली करण्यात आली. त्यातील ८० टक्के घटक स्वदेशी बनावटीचे होते. इक्षकची वैशिष्टये १. हायड्रोग्राफिक सर्वेक्षणासाठी डिझाइन २. मानवतावादी मदत आणि आपत्ती निवारणात योगदान ३. नैसर्गिक आपत्ती, युद्धकाळ, जहाज अपघातांत उपयोगी ४. जहाजावर सहा खाटांचे रुग्णालय ५. दोन इंजिनांनी सुसज्ज ६. ११० मीटर लांब, १६ मीटर रुंद, वजन ३,४०० टन ७. २०० नौदल कर्मचाऱ्यांना सामावून घेते ८. जहाजाचा वेग ताशी ३० सागरी मैल
