Indore News : दिल्लीतील एआय इम्पॅक्ट समिटमध्ये युवक काँग्रेसने केलेल्या आंदोलनाचे पडसाद शनिवारी इंदूरमध्ये उमटल्याचे पाहायला मिळाले. भारतीय जनता युवा मोर्चा (भाजयुमो) आणि काँग्रेस कार्यकर्त्यांमध्ये झालेल्या जोरदार राडा आणि दगडफेकीत एका पोलीस उपनिरीक्षकासह दोन पत्रकार आणि अन्य १० जण जखमी झाले आहेत. परिस्थिती नियंत्रणात आणण्यासाठी पोलिसांना वॉटर कॅनन करावा लागला. या संघर्षाची ठिणगी शुक्रवारी दिल्लीत पडली होती. दिल्लीतील एआय परिषदेत युवक काँग्रेसच्या कार्यकर्त्यांनी शर्ट काढून सरकारविरोधी घोषणाबाजी केली होती. या कृत्याचा निषेध करण्यासाठी आज भाजप युवा मोर्चाचे कार्यकर्ते इंदूरमधील काँग्रेसचे मुख्यालय असलेल्या गांधी भवनला घेराव घालण्यासाठी जमले होते. भाजप कार्यकर्ते येत असल्याची माहिती मिळताच काँग्रेसचे कार्यकर्तेही मोठ्या संख्येने कार्यालयाबाहेर जमा झाले आणि दोन्ही बाजूने जोरदार घोषणाबाजी सुरू झाली. सुरुवातीला केवळ घोषणाबाजीपर्यंत मर्यादित असलेला हा वाद काही वेळातच विकोपाला गेला. पोलिसांनी दोन्ही गटांना रोखण्यासाठी बॅरिकेड्स लावले होते, मात्र संतप्त कार्यकर्त्यांनी एकमेकांच्या दिशेने दगडफेक सुरू केली. या गोंधळात केवळ दगडच नव्हे, तर पाण्याच्या बाटल्या आणि फळेही फेकण्यात आली. या दगडफेकीत कर्तव्य बजावत असलेले एक पोलीस उपनिरीक्षक आणि घटनेचे कव्हरेज करणारे दोन माध्यम प्रतिनिधी जखमी झाले. वाढता हिंसाचार पाहून पोलिसांनी अखेर बळाचा वापर करत पाण्याचा मारा केला आणि जमावाला पांगवले. दोन्ही गटाकडुन आरोप-प्रत्यारोप दरम्यान, या घटनेनंतर दोन्ही पक्षांनी एकमेकांवर आरोप-प्रत्यारोप सुरू केले आहेत. काँग्रेसने भाजपवर कार्यालयावर हल्ला केल्याचा आरोप केला आहे, तर भाजपने काँग्रेस कार्यकर्त्यांनीच दगडफेक सुरू केल्याचा दावा केला आहे. शहरात सध्या तणावपूर्ण शांतता असून महत्त्वाच्या चौकांमध्ये पोलीस बंदोबस्त तैनात करण्यात आला आहे.सीसीटीव्ही फुटेझच्या आधारे आरोपींची ओळख पटवली जात असून त्यांच्यावर कठोर कारवाई केली जाईल, असे पोलिसांकडुन सांगण्यात आले आहे.
