Indore Horrific Road Accident। मध्य प्रदेशात शुक्रवारी सकाळी एक मोठा रस्ता अपघात झाला. इंदूरमधील तेजाजी नगर बायपासवर एका ट्रक आणि कारची जोरदार टक्कर झाली. या अपघातात चक्काचूर झाल्याचे दिसून आलं. या अपघातात दोन तरुण आणि एका तरुणीचा मृत्यू झाला. मध्य प्रदेशचे माजी गृहमंत्री आणि काँग्रेस नेते बाला बच्चन यांची मुलगी ही तरुणी प्रेरणा होती. बाला बच्चन मध्य प्रदेशातील राजपूर येथील विद्यमान आमदार आहेत. मात्र, काँग्रेस नेत्याने अद्याप कोणतेही निवेदन जारी केलेले नाही. पोलिसांनी दिलेल्या माहितीनुसार, प्रखर कासलीवाल आणि मनू संधू रात्री उशिरा तेजाजी नगर पोलिस स्टेशन परिसरात त्यांच्या महिला मैत्रिणी प्रेरणा बच्चन आणि अनुष्का राठी यांच्यासोबत एका पार्टीतून परतत होते. त्यांची भरधाव कार एका ट्रकला धडकली. त्यातून हा अपघात झाल्याचे सांगण्यात येत आहे. तसेच प्रखरचा वाढदिवस होता, म्हणून सर्वजण तो साजरा करण्यासाठी महू याठिकाणी गेले होते. पहाटे परतताना रालामंडलजवळ हा अपघात झाला. अपघात इतका भीषण होता कि कर चक्क ट्रकमध्ये घुसली आणि तिचे मोठ्याप्रमाणात नुकसान झाले. दरम्यान, ट्रकमध्ये घुसलेली कार शेवटी कटरने कापण्यात आली आणि तिघांचे मृतदेह बाहेर काढण्यात आले. एक प्रवासी जखमी झाला. नंतर क्रेनच्या साहाय्याने गाडी बाहेर काढण्यात आली. तिन्ही मृतदेह शवविच्छेदनासाठी एमवाय हॉस्पिटलमध्ये पाठवण्यात आले. डीसीपी कृष्णलाल चांदानी यांनी सांगितले की, माजी गृहमंत्री बाला बच्चन यांच्या मुलीचा आणि त्यांच्या दोन मैत्रिणींचा अपघातात मृत्यू झाला. जखमी मुलीची प्रकृती आता स्थिर आहे आणि तिला उपचारासाठी एमवाय हॉस्पिटलमध्ये पाठवण्यात आले आहे. दरम्यान , घटनेची चौकशी सुरू असल्याचे पोलिसांकडून सांगण्यात येत आहे.
