Stock Market Closing On 5 April 2024: आठवड्याचे शेवटचे ट्रेडिंग सत्र भारतीय शेअर बाजारासाठी खूप चांगले होते. निर्देशांक फ्लॅट बंद झाले. परंतु आरबीआयच्या पतधोरणाच्या घोषणेने उत्साही बाजारात बँकिंग समभागांमध्ये जोरदार खरेदी झाली आहे, तर मिडकॅप आणि स्मॉलकॅप समभागांमध्येही मोठी वाढ झाली आहे. आजच्या व्यवहाराअंती BSE सेन्सेक्स 21 अंकांनी वधारून 74248 अंकांवर तर राष्ट्रीय शेअर बाजाराचा निफ्टी 22,513 अंकांवर बंद झाला.

मार्केट कॅप 400 लाख कोटी रुपयांच्या वर पोहोचण्याच्या मार्गावर –

शेअर बाजारात बँकिंग मिडकॅप आणि स्मॉलकॅप समभागांच्या खरेदीमुळे बीएसईवर सूचीबद्ध समभागांचे बाजार भांडवल 399.41 लाख कोटी रुपयांवर बंद झाले आहे. जे गेल्या ट्रेडिंग सत्रात 398.60 लाख कोटी रुपये होते. म्हणजेच आजच्या व्यवसायात मार्केट कॅपमध्ये 81000 कोटी रुपयांची झेप घेतली आहे.

निफ्टीचा मिडकॅप निर्देशांक 50,000 च्या पुढे बंद –

आजच्या व्यवहारात बँकिंग शेअर्समध्ये वाढ झाली, त्यामुळे निफ्टी बँक 432 अंकांच्या उसळीसह 48,493 अंकांवर बंद झाला. फार्मा, एफएनसीजी मेटल्स, रिअल इस्टेट, कंझ्युमर ड्युरेबल्स आणि ऑइल अँड गॅस क्षेत्रातील समभागही तेजीने बंद झाले. पण ऑटो, आयटी, हेल्थकेअर मीडिया आणि एनर्जी शेअर्समध्ये घसरण दिसून आली आहे. निफ्टीच्या मिडकॅप निर्देशांकाने प्रथमच 50,000 चा टप्पा ओलांडला आहे आणि 50022 अंकांच्या आजीवन उच्चांकावर बंद झाला आहे. तर स्मॉल कॅप निर्देशांक 136 अंकांच्या उसळीसह 16,355 अंकांवर बंद झाला. 3948 शेअर्सचे व्यवहार झाले ज्यामध्ये 2424 शेअर्स वाढीसह आणि 1424 शेअर्स तोट्यासह बंद झाले. 100 शेअर्सच्या किमतीत कोणताही बदल झालेला नाही.

वाढणारे आणि घसरणारे शेअर्स –
कोटक महिंद्राचे समभाग 2.09 टक्के, बजाज फिनसर्व्ह 1.56 टक्के, एचडीएफसी बँक 1.41 टक्के, आयटीसी 1.21 टक्के, एसबीआय 0.67 टक्के वाढीसह बंद झाले, तर अल्ट्राटेक सिमेंट 1.82 टक्के, एल एॅण्ड टी 1.54 टक्के, भारती एअरटेल 1.28 टक्के, बजाज ऑटो 1.25 टक्के, मारुती सुझूकी 1.21 टक्क्यांच्या घसरणीसह बंद झाले.

या आठवड्याचा बाजार कसा होता ?

देशांतर्गत शेअर बाजारात सलग तिसऱ्या आठवड्यात वाढ दिसून आली. निफ्टीने सुमारे 1% वाढ दर्शविली. मिडकॅप निर्देशांक साप्ताहिक पातळीवर गेल्या 7 महिन्यांतील सर्वोच्च पातळीवर बंद झाला. या निर्देशांकाने 4% ची वाढ दर्शविली. निफ्टी बँकेत या आठवड्यात 2% ची वाढ झाली, जी 4 महिन्यांतील सर्वात मोठी साप्ताहिक वाढ आहे. एफएमसीजी क्षेत्र वगळता इतर सर्व क्षेत्रांमध्ये वाढ झाली आहे.

या आठवड्यात सर्वात वेगवान स्टॉक एचडीएफसी बँकेचा होता. 7% च्या वाढीसह, हा स्टॉक 17 महिन्यांनंतर या पातळीवर बंद झाला आहे. या आठवड्यात डिवीज लॅब्स, एचडीएफसी बँक, श्रीराम फायनान्स, एनटीपीसी, महिंद्रा अँड महिंद्रा आणि टाटा स्टीलचे शेअर्स निफ्टीच्या सर्वात वेगाने वाढणाऱ्या समभागांच्या यादीत होते. हिरो मोटोकॉर्प, नेस्ले इंडिया सिप्ला, भारती एअरटेल, बीपीसीएल आणि ग्रासिम यांच्या समभागांचा निफ्टीच्या कमकुवत समभागांच्या यादीत समावेश आहे. सिटी युनियन बँक, वेदांता, एबी कॅपिटल, नाल्को आणि हिंद कॉपर या समभागांचा मिडकॅपमध्ये समावेश होता.