HSBC Hurun List 2026 : जगातील आघाडीच्या कंपन्यांचे नेतृत्व भारतीय वंशाचे अधिकारी करत असल्याचे HSBC हुरुन ग्लोबल इंडियन्स लिस्ट २०२६ मधून समोर आले आहे. अल्फाबेटचे मुख्य कार्यकारी अधिकारी (CEO) सुंदर पिचाई यांनी या यादीत पहिले स्थान मिळवले आहे.

मायक्रोसॉफ्टचे सत्या नडेला दुसऱ्या, तर मायक्रॉन टेक्नॉलॉजीचे संजय मेहरोत्रा तिसऱ्या क्रमांकावर आहेत. या यादीतील २३६ भारतीय वंशाच्या अधिकाऱ्यांच्या नेतृत्वाखालील २०० कंपन्यांचे एकूण मूल्य १५ ट्रिलियन डॉलर (सुमारे १,३५० लाख कोटी रुपये) आहे.

अल्फाबेटचे मूल्य ४.२ ट्रिलियन डॉलर –

सुंदर पिचाई यांच्या नेतृत्वाखालील अल्फाबेट ही भारतीय वंशाच्या अधिकाऱ्यांकडून चालवल्या जाणाऱ्या कंपन्यांमध्ये सर्वाधिक मूल्यवान ठरली आहे. कंपनीचे मूल्य ४.२ ट्रिलियन डॉलरवर पोहोचले आहे. २०२४ मधील पहिल्या यादीच्या तुलनेत त्यात सुमारे ९८ टक्के वाढ झाली आहे. याच काळात मायक्रोसॉफ्टच्या कंपनी मूल्यामध्ये १७ टक्के घट झाली आहे. त्यामुळे अल्फाबेटने मायक्रोसॉफ्टला मागे टाकले आहे.

या यादीत मायक्रोसॉफ्टचे सत्या नडेला दुसऱ्या, तर मायक्रॉन टेक्नॉलॉजीचे संजय मेहरोत्रा तिसऱ्या क्रमांकावर आहेत. यूट्यूबचे मुख्य कार्यकारी अधिकारी नील मोहन आणि गुगल क्लाउडचे प्रमुख थॉमस कुरियन यांचाही पहिल्या पाच जणांमध्ये समावेश आहे.

मायक्रॉनच्या मूल्यात १,१७४ टक्के वाढ –

या यादीतील पहिल्या पाच कंपन्यांमध्ये मायक्रॉन टेक्नॉलॉजीच्या मूल्यामध्ये सर्वाधिक वाढ झाली आहे. कंपनीचे मूल्य १,१७४ टक्क्यांनी वाढून १.४ ट्रिलियन डॉलर झाले आहे. कृत्रिम बुद्धिमत्ता (AI) क्षेत्रातील वाढत्या मागणीचा याला मोठा फायदा झाला आहे. एआय तंत्रज्ञानासाठी मोठ्या प्रमाणात मेमरी चिप्सची गरज असते. मायक्रॉन ही कंपनी अशा चिप्स तयार करण्याच्या व्यवसायात आहे.

यादीतील पहिल्या पाच कंपन्यांचे एकत्रित मूल्य ९.१ ट्रिलियन डॉलर आहे. हे संपूर्ण यादीतील कंपन्यांच्या एकूण मूल्याच्या सुमारे ६१ टक्के आहे. पहिल्या दहा कंपन्यांचे एकूण मूल्य १०.५ ट्रिलियन डॉलरपर्यंत पोहोचले आहे.

एआय क्षेत्रात भारतीय वंशाच्या अधिकाऱ्यांचे नेतृत्व –

२०२६ च्या हुरुन यादीत प्रथमच कृत्रिम बुद्धिमत्तेला स्वतंत्र उद्योग क्षेत्र म्हणून स्थान देण्यात आले आहे. या क्षेत्रातील १८ कंपन्यांचे एकूण मूल्य २२७ अब्ज डॉलर आहे. यादीतील २०० कंपन्यांपैकी १०३ कंपन्या एआय तंत्रज्ञानावर आधारित आहेत किंवा आपल्या व्यवसायात मोठ्या प्रमाणावर त्याचा वापर करतात. या कंपन्यांचे एकूण मूल्य १०.७ ट्रिलियन डॉलर आहे. म्हणजेच संपूर्ण यादीतील मूल्याच्या सुमारे ७१ टक्के वाटा या कंपन्यांचा आहे.

कर्सर (Cursor) हे ६० अब्ज डॉलर मूल्य असलेले या यादीतील सर्वाधिक मूल्यवान स्टार्टअप ठरले आहे. पहिल्या दहा स्टार्टअपपैकी सात कंपन्या एआय क्षेत्रातील आहेत. या दहाही कंपन्यांची मुख्य कार्यालये अमेरिकेत आहेत. उद्योग क्षेत्रानुसार सॉफ्टवेअर आणि सेवा क्षेत्रातील सर्वाधिक ५३ कंपन्यांचा यादीत समावेश आहे. त्यानंतर आर्थिक सेवा क्षेत्रातील ३१ आणि आरोग्य क्षेत्रातील २१ कंपन्या आहेत.

अमेरिकेत सर्वाधिक भारतीय वंशाचे अधिकारी –

या यादीतील २३६ अधिकाऱ्यांपैकी १७७ जण अमेरिकेत राहतात. त्यानंतर संयुक्त अरब अमिराती (UAE) आणि ब्रिटनमध्ये प्रत्येकी १५, तर सिंगापूरमध्ये नऊ अधिकारी राहतात. शहरांचा विचार करता सॅन फ्रान्सिस्कोमध्ये सर्वाधिक ४० अधिकारी आहेत. दुबईमध्ये १५, तर पालो ऑल्टो आणि लंडनमध्ये प्रत्येकी १३ अधिकारी राहतात.

अमेरिकेतील कॅलिफोर्निया राज्यात ९१ भारतीय वंशाचे अधिकारी आहेत. भारतातील त्यांच्या मूळ राज्यांचा विचार करता महाराष्ट्र २२ जणांसह पहिल्या क्रमांकावर आहे. दिल्लीतील २१ आणि तामिळनाडूतील १५ जणांचा या यादीत समावेश आहे.

आयआयटीसह भारतीय संस्थांमध्ये शिक्षण –

जगातील मोठ्या कंपन्यांचे नेतृत्व करणाऱ्या अनेक अधिकाऱ्यांचे शिक्षण भारतात झाले आहे. यादीतील सुमारे ५८ टक्के अधिकाऱ्यांनी पदवीचे शिक्षण भारतात पूर्ण केले आहे. यामध्ये आयआयटी दिल्ली आघाडीवर असून, तेथून शिक्षण घेतलेले १५ जण या यादीत आहेत. मुंबई विद्यापीठातील १२ आणि आयआयटी मद्रासमधील ११ जणांचा समावेश आहे.

पदव्युत्तर शिक्षणासाठी स्टॅनफोर्ड विद्यापीठ आघाडीवर आहे. येथून १९ जणांनी शिक्षण घेतले आहे. पदव्युत्तर शिक्षण घेतलेल्या १७६ अधिकाऱ्यांपैकी सुमारे ७३ टक्के जणांनी अमेरिकेतील संस्थांमधून शिक्षण पूर्ण केले आहे.

यादीत १६ महिलांचा समावेश –

२०२४ मध्ये या यादीत १२ महिलांचा समावेश होता. २०२६ मध्ये ही संख्या वाढून १६ झाली आहे. या महिलांच्या नेतृत्वाखालील कंपन्यांचे एकूण मूल्य ६९९ अब्ज डॉलर आहे. अरिस्ता नेटवर्क्सच्या मुख्य कार्यकारी अधिकारी जयश्री व्ही. उल्लाल या यादीतील आघाडीच्या महिला अधिकारी आहेत. त्यांच्या कंपनीचे मूल्य २०८ अब्ज डॉलर आहे. त्यानंतर व्हर्टेक्स फार्माच्या रेश्मा केवलरमानी आणि यूएस बँकॉर्पच्या गुंजन केडिया यांचा क्रमांक लागतो.

२३ वर्षांचे तरुण सर्वात कमी वयाचे सदस्य –

या यादीत मर्कर (Mercor) या कंपनीचे २३ वर्षीय सहसंस्थापक आदर्श हिरेमठ आणि सूर्या मिधा हे सर्वात कमी वयाचे सदस्य आहेत. तर सिम्फनीएआयचे संस्थापक रोमेश वाधवानी हे ७९ वर्षांचे असून, यादीतील सर्वात ज्येष्ठ उद्योजक आहेत. यादीतील सर्व सदस्यांचे सरासरी वय ५५ वर्षे आहे.

‘ब्रेन ड्रेन’ऐवजी ‘ब्रेन ब्रिज’ची संकल्पना –

हुरुन इंडियाचे संस्थापक आणि मुख्य संशोधक अनस रहमान जुनैद यांच्या मते, पूर्वी भारतीय प्रतिभावंत परदेशात गेल्याला ‘ब्रेन ड्रेन’ म्हणजेच देशातील बुद्धिमान मनुष्यबळाचे स्थलांतर म्हटले जात होते. मात्र, आता भारतीय वंशाचे अधिकारी जगातील मोठ्या कंपन्यांचे नेतृत्व करत आहेत. त्यामुळे भारत आणि जग यांच्यातील कौशल्य, व्यवसाय आणि संधींचा संबंध अधिक मजबूत होत आहे. यालाच त्यांनी ‘ब्रेन ब्रिज’ असे संबोधले आहे.

HSBC इंडियाचे आंतरराष्ट्रीय संपत्ती आणि प्रीमियर बँकिंग विभागाचे प्रमुख संदीप बत्रा यांनीही भारतीय वंशाच्या अधिकाऱ्यांचे यश केवळ परदेशातील कामगिरीपुरते मर्यादित नसल्याचे म्हटले आहे. हे अधिकारी भारत आणि जगातील व्यवसाय, संधी आणि संबंध अधिक मजबूत करत असल्याचे त्यांनी स्पष्ट केले.