Vijay Shankar Announces Retirement : भारतीय क्रिकेट वर्तुळातून आज एक अत्यंत धक्कादायक आणि मोठी वृत्त समोर आले आहे. भारतीय संघाचा अष्टपैलू खेळाडू आणि क्रिकेट विश्वात ‘थ्री डी (3D) प्लेयर’ म्हणून ओळखल्या जाणाऱ्या विजय शंकरने आज २२ मे रोजी क्रिकेटच्या सर्व फॉरमॅटमधून आपल्या निवृत्तीची घोषणा केली आहे. विजय शंकरने सोशल मीडिया प्लॅटफॉर्मवर एक सविस्तर भावुक पोस्ट शेअर करत चाहत्यांना ही माहिती दिली. यामध्ये त्याने आंतरराष्ट्रीय क्रिकेटसोबतच आयपीएल आणि देशांतर्गत क्रिकेटलाही कायमचा रामराम ठोकल्याचे स्पष्ट केले आहे. २५ वर्षांच्या प्रवासाचा शेवट – विजय शंकरने आपल्या पोस्टमध्ये लिहिले, “क्रिकेट हेच माझे जीवन आहे, वयाच्या १० व्या वर्षापासून मी क्रिकेट खेळण्यास सुरुवात केली होती. आज २५ वर्षांनंतर मी स्वतःला भाग्यवान समजतो की मला प्रत्येक त्या स्तरावर खेळण्याची संधी मिळाली, ज्याचे स्वप्न प्रत्येक खेळाडू पाहत असतो. मी आता नवीन संधींच्या शोधात देशांतर्गत आणि आयपीएल क्रिकेटमधूनही निवृत्ती घेण्याचा निर्णय घेतला आहे. देशासाठी खेळणे हा माझ्या आयुष्यातील सर्वात आनंदाचा क्षण होता. मला मिळालेल्या प्रेमाबद्दल मी नेहमीच ऋणी राहीन. मी बीसीसीआय, माझे सर्व प्रशिक्षक, सपोर्ट स्टाफ आणि हितचिंतकांचे मनापासून आभार मानतो.” 🙏🏻 pic.twitter.com/d7yxU1L70s — Vijay Shankar (@vijayshankar260) May 22, 2026 २०१९ चा वर्ल्ड कप आणि ‘त्या’ पहिल्याच बॉलचा इतिहास! २०१९ च्या वनडे वर्ल्ड कपसाठी अंबाती रायडूला डावलून जेव्हा विजय शंकरची भारतीय संघात निवड झाली, तेव्हा तत्कालीन मुख्य निवडकर्ता एमएसके प्रसाद यांनी त्याला ‘थ्री-डायमेंशनल’ (३डी) खेळाडू म्हटले होते. या निवडीवर प्रचंड टीका झाली होती. मात्र, त्याच वर्ल्ड कपमध्ये पाकिस्तानविरुद्धच्या सामन्यात भुवनेश्वर कुमार दुखापतग्रस्त झाल्यानंतर जेव्हा विजय शंकर गोलंदाजीला आला, तेव्हा त्याने आपल्या पहिल्याच चेंडूवर विकेट घेत इतिहास रचला होता. हेही वाचा – Vaibhav Sooryavanshi Comparison : “वैभव सूर्यवंशीची सचिन तेंडुलकरशी तुलना करू नका!”; माजी भारतीय खेळाडूचं वक्तव्य असे राहिले विजय शंकरचे क्रिकेट करिअर – आंतरराष्ट्रीय कारकीर्द: विजय शंकरने भारतासाठी १२ वनडे सामन्यांत २२३ धावा आणि ४ विकेट्स घेतल्या, तर ९ टी-२० सामन्यांत १०१ धावा आणि ५ विकेट्स पटकावल्या. आयपीएल कारकीर्द: आयपीएलमध्ये तो चेन्नई सुपर किंग्स, गुजरात टायटन्स, दिल्ली कॅपिटल्स आणि सनरायझर्स हैदराबाद अशा ४ मोठ्या संघांसाठी खेळला. त्याने ७८ सामन्यांत १,२३३ धावा केल्या आणि ९ विकेट्स घेतल्या. देशांतर्गत कारकीर्द: तामिळनाडू संघाकडून खेळताना त्याने ७७ प्रथम श्रेणी सामन्यांत ४६.७३ च्या उत्कृष्ट सरासरीने ४,२५३ धावा कुटल्या, ज्यामध्ये १३ शतके आणि २३ अर्धशतकांचा समावेश आहे. तसेच त्याने ४३ विकेट्सही घेतल्या.
