Wedding season : देशात लग्नसराईचा धुमधडाका! 25 दिवसांत 52 लाख विवाह; बाजारात 7.5 लाख कोटींच्या उलाढालीचा अंदाज
Wedding season : २१ नोव्हेंबर ते १५ डिसेंबरदरम्यान देशात ५२ लाख विवाह होण्याचा अंदाज. लग्नसराईत ७.५ लाख कोटींची उलाढाल आणि १.२५ कोटी रोजगाराच्या संधी अपेक्षित.

Wedding season : देशात २१ नोव्हेंबर ते १५ डिसेंबर २०२६ या काळात लग्नसराईचा मोठा हंगाम सुरू झाला आहे. या २५ दिवसांत देशभरात सुमारे ५२ लाख विवाह होण्याचा अंदाज आहे. यातून तब्बल ७.५ लाख कोटी रुपयांची उलाढाल होऊ शकते, असा अंदाज व्यापाऱ्यांची संघटना कॉन्फेडरेशन ऑफ ऑल इंडिया ट्रेडर्सने (CAIT) व्यक्त केला आहे. म्हणजेच दररोज सरासरी दोन लाखांहून अधिक विवाह होतील. याचा फायदा दागिने, कपडे, खाद्यपदार्थ, इलेक्ट्रॉनिक्स, हॉटेल आणि सजावट व्यवसायाला होण्याची शक्यता आहे.
दागिने आणि कपड्यांच्या खरेदीला मोठी मागणी – (Wedding season )
CAIT च्या अंदाजानुसार, लग्नसराईतील एकूण उलाढालीपैकी ४.०५ लाख कोटी रुपये वस्तूंच्या खरेदीतून, तर ३.४५ लाख कोटी रुपये विविध सेवांमधून मिळण्याची शक्यता आहे. दागिने आणि मौल्यवान धातूंच्या खरेदीतून १.२० लाख कोटी रुपये, तर कपडे आणि साड्यांच्या विक्रीतून ९० हजार कोटी रुपयांची उलाढाल अपेक्षित आहे. भेटवस्तू आणि खाद्यपदार्थांच्या खरेदीतून प्रत्येकी ३७,५०० कोटी रुपये मिळण्याचा अंदाज आहे. इलेक्ट्रॉनिक्स, मिठाई, सुकामेवा आणि फर्निचरच्या विक्रीतून प्रत्येकी ३० हजार कोटी रुपयांचा व्यवसाय होऊ शकतो.
दिल्ली-एनसीआरमध्ये पाच लाख विवाह – (Wedding season )
लग्नसराईचा मोठा फायदा दिल्ली आणि राष्ट्रीय राजधानी परिसराला (एनसीआर) होण्याची शक्यता आहे. या भागात सुमारे पाच लाख विवाह होण्याचा अंदाज असून, त्यातून २.५० लाख कोटी रुपयांची उलाढाल अपेक्षित आहे. त्यामुळे हा भाग देशातील मोठ्या विवाह बाजारपेठांपैकी एक ठरण्याची शक्यता आहे.
१.२५ कोटी रोजगाराच्या संधी – (Wedding season )
लग्नसराईमुळे केवळ दुकानदारांनाच नाही, तर विविध सेवा देणाऱ्या लोकांनाही काम मिळणार आहे. मंडप सजावट करणारे, केटरर्स, छायाचित्रकार, ब्युटीशियन, हॉटेल व्यावसायिक, वाहतूकदार आणि इव्हेंट मॅनेजमेंट क्षेत्रातील लोकांना रोजगाराच्या संधी मिळतील. या हंगामात सुमारे १.२५ कोटी तात्पुरत्या आणि हंगामी रोजगाराच्या संधी निर्माण होण्याचा CAIT चा अंदाज आहे.
मागील वर्षापेक्षा व्यवसायात वाढ अपेक्षित – (Wedding season )
CAIT च्या आकडेवारीनुसार, २०२५ च्या लग्नसराईत सुमारे ६.५० लाख कोटी रुपयांचा व्यवसाय झाला होता. यंदा तो ७.५० लाख कोटी रुपयांपर्यंत पोहोचण्याची शक्यता आहे. म्हणजेच मागील वर्षाच्या तुलनेत सुमारे १५ टक्के वाढ अपेक्षित आहे. मात्र, ही व्यापारी संघटनेची व्यावसायिक उलाढालीबाबतची अपेक्षा आहे; प्रत्यक्ष उलाढाल किती होते, हे हंगाम संपल्यानंतर स्पष्ट होईल.





