न्यूयॉर्क – भारताला संयुक्त राष्ट्र सुरक्षा परिषदेच्या तीन प्रमुख समित्यांचे अध्यक्षपद मिळाले आहे. 2022 साठीची दहशतवादविरोधी समिती, तालिबान निर्बंध समिती आणि लीबिया निर्बंध समितीचे अध्यक्षपद भारताला मिळाल्याचे संयुक्त राष्ट्र सुरक्षा परिषदेतले भारताचे कायमस्वरूपी प्रतिनिधी टी. एस. त्रिमूर्ती यांनी आज सांगितले. दहशतवादविरोधी समितीचे अध्यक्षपद मिळणे भारतासाठी विशेष उल्लेखनीय असल्याचे त्रिमूर्ती यांनी नमूद केले.सीमेपलीकडच्या दहशतवादाशी लढण्यात भारत अग्रेसर असून, या दहशतवादाचा सर्वाधिक फटकाही भारताला बसला आहे, असे ते म्हणाले. अफगाणिस्तानबद्दल असलेली शांतता, सुरक्षा, विकास आणि प्रगती याविषयीची भारताची बांधिलकी लक्षात घेता तालिबान निर्बंध समितीला नेहमीच प्राधान्य राहिले आहे, असेही त्रिमूर्ती म्हणाले. लीबिया आणि तिथल्या शांतता प्रक्रियेवर सगळ्या जगाचे लक्ष असताना त्याविषयीच्या समितीचे अध्यक्षपद महत्त्वाचे असल्याचेही त्यांनी नमूद केले.
