Indian Economy : पश्चिम आशियातील भूराजकीय तणाव, चलनातील घसरण आणि अल-निनोचा शेतीवर होणारा संभाव्य परिणाम यामुळे चालू आर्थिक वर्षात (FY27) भारताचा विकास दर मंदावून 6.8% राहण्याचा अंदाज ‘इंडिया रेटिंग्ज अँड रिसर्च’ने (Ind-Ra) वर्तवला आहे. गेल्या आर्थिक वर्षात (FY26) हाच दर 7.6% इतका नोंदवला गेला होता.

RBI आणि Ind-Ra च्या अंदाजात सुधारणा –

Ind-Ra ने मे महिन्यातील 6.7% च्या अंदाजावरून FY27 साठीच्या विकास दरात 6.8% पर्यंत किंचित सुधारणा केली आहे. याआधी रिझर्व्ह बँक ऑफ इंडियानेही (RBI) मजबूत देशांतर्गत अर्थव्यवस्थेच्या जोरावर आपला वाढीचा अंदाज 6.6% वरून 6.7% केला होता.

महत्त्वाचे आर्थिक अंदाज –

कच्चे तेल: FY27 मध्ये कच्च्या तेलाची सरासरी किंमत $85 प्रति बॅरल राहण्याचा अंदाज आहे (मे मधील अंदाज $95/बॅरल होता). एप्रिल-जुलै दरम्यान ही सरासरी $96.49 प्रति बॅरल, तर जून तिमाहीत $101.31 प्रति बॅरल होती.

रुपयाचे मूल्य: FY27 मध्ये डॉलरच्या तुलनेत रुपया सरासरी ₹93.98 राहू शकतो, जी वार्षिक आधारावर 6.4% ची घसरण दर्शवते.

चलनवाढ व चालू खात्यातील तूट: किरकोळ महागाई दर FY26 मधील 2% वरून वाढून सरासरी 4.9% राहण्याची शक्यता आहे. चालू खात्यातील तूट (CAD) GDP च्या 1.5% (FY26 मध्ये 0.6%) पर्यंत वाढू शकते.

भांडवली ओघ: FCNR (B) आणि बाह्य व्यावसायिक कर्जांद्वारे (ECB) सुमारे $70 अब्ज भांडवल भारतात येण्याचा अंदाज आहे.

अल-निनोमुळे महागाईचे आव्हान –

कच्च्या तेलाच्या घसरणाऱ्या किमती व्यापार तूट कमी करण्यास मदत करतील; मात्र अल-निनोमुळे अन्नधान्य महागल्यास तेलाच्या स्वस्ताईचा फायदा मर्यादित ठरेल, असे Ind-Ra चे मुख्य अर्थतज्ज्ञ देवेंद्र पंत यांनी नमूद केले.

तसेच एलपीजी आणि खतांवरील वाढत्या सबसिडीमुळे FY27 चे 4.3% वित्तीय तुटीचे लक्ष्य गाठणे आव्हानात्मक असेल. प्रत्यक्ष कर व गैर-कर महसुलामुळे तूट नियंत्रणात ठेवण्यास मदत होईल, मात्र अप्रत्यक्ष कर संकलनात अडचणी येऊ शकतात.