Forex Reserves : भारताच्या परकीय चलनसाठ्यात पुन्हा मोठी वाढ झाली आहे. 28 ऑगस्ट रोजी संपलेल्या आठवड्यात देशाचा परकीय चलनसाठा 11.475 अब्ज डॉलरने वाढून 740.803 अब्ज डॉलरवर पोहोचला आहे. ही आतापर्यंतची सर्वाधिक पातळी आहे. भारतीय रिझर्व्ह बँकेने (RBI) शुक्रवारी ही आकडेवारी जाहीर केली.

यापूर्वी 21 ऑगस्टला संपलेल्या आठवड्यात भारताचा परकीय चलनसाठा 729.328 अब्ज डॉलर होता. म्हणजेच अवघ्या एका आठवड्यात त्यात मोठी वाढ झाली आहे.

शेअर बाजारात तेजी येणार?

परकीय चलनसाठ्यात झालेली ही मोठी वाढ भारतीय अर्थव्यवस्थेसाठी चांगली बातमी मानली जात आहे. शुक्रवारी भारतीय शेअर बाजार तेजीने बंद झाला. त्यामुळे सोमवारीही बाजारात सकारात्मक वातावरण राहण्याची शक्यता आहे.

डॉलर, युरो आणि पाउंडचा साठा वाढला

परकीय चलनसाठ्यातील सर्वात मोठा भाग फॉरेन करन्सी अॅसेट्स (FCA) असतो. 28 ऑगस्टला संपलेल्या आठवड्यात FCAमध्ये 9.337 अब्ज डॉलरची वाढ झाली. त्यामुळे हा साठा 600.670 अब्ज डॉलरवर पोहोचला.

FCAमध्ये फक्त अमेरिकी डॉलर नसतो. त्यात युरो, येन आणि पाउंड यांसारख्या प्रमुख परदेशी चलनांचाही समावेश असतो. या सर्व चलनांचे मूल्य डॉलरमध्ये मोजले जाते.

सोन्याच्या साठ्यातही वाढ

भारताच्या सोन्याच्या साठ्याच्या मूल्यातही मोठी वाढ झाली आहे. आठवडाभरात सोन्याच्या साठ्याची किंमत 2.191 अब्ज डॉलरने वाढून 116.409 अब्ज डॉलर झाली.

दरम्यान, SDRचा साठा 43 दशलक्ष डॉलरने कमी होऊन 18.810 अब्ज डॉलर झाला. तसेच IMFमधील भारताची रिझर्व्ह पोझिशन 11 दशलक्ष डॉलरने घटून 4.914 अब्ज डॉलर झाली.

परकीय चलनसाठा कसा वाढला ?

देशात डॉलर आणण्यासाठी RBIने काही योजना सुरू केल्या आहेत. या योजनांमुळे भारतात 136 अब्ज डॉलरपेक्षा जास्त निधी आल्याचे सांगितले जाते. त्यामुळे देशाच्या परकीय चलनसाठ्यात मोठी वाढ झाली आहे.

परकीय चलनसाठा महत्त्वाचा का?

परकीय चलनसाठा म्हणजे देशाकडे असलेला डॉलर आणि इतर परदेशी चलनांचा साठा. हा साठा देशाच्या अर्थव्यवस्थेसाठी खूप महत्त्वाचा असतो.

समजा, डॉलरच्या तुलनेत रुपया वेगाने घसरू लागला. अशावेळी RBI आपल्या परकीय चलनसाठ्यातील डॉलर बाजारात विकू शकते. त्यामुळे डॉलरची उपलब्धता वाढते आणि रुपयावरील दबाव कमी करण्यास मदत होते.

म्हणूनच परकीय चलनसाठा वाढणे हे भारताच्या अर्थव्यवस्थेसाठी चांगले आणि मजबूत आर्थिक स्थितीचे संकेत मानले जातात.