थायलंडमधील भारतीय समुदायाला मोदींचे संबोधन बॅंकॉक : दहशतवाद आणि फुटीरतावादाच्या बीज पेरण्यामागील एक मोठे कारण भारताने दूर केले आहे, असे पंतप्रधान नरेंद्र मोदी यांनी शनिवारी येथे सांगितले. जम्मू-काश्मीरमधील कलम 0 370 रद्द करणे आणि राज्याच्या पुनर्रचनेच्या स्पष्ट संदर्भात ते बोलत होते. आपले सरकार अशक्य वाटणारी उद्दीष्टे पूर्ण करण्यासाठी प्रयत्नशील आहे, असे थायलंडमधील भारतीय समुदायाला संबोधित करताना पंतप्रधान मोदी म्हणाले. दहशतवाद आणि फुटीरतावाद यांच्या बीज पेरण्यामागील मोठे कारण दूर करण्याचा भारताने निर्णय घेतला आहे हे आपणास ठाऊक आहे. जेव्हा निर्णय योग्य असेल तेव्हा त्याचे प्रतिध्वनी जगभरात ऐकू येतात. हे प्रतिध्वनी मला थायलंडमध्येही ऐकू येत आहेत, असे मोदी म्हणाले. कलम 370 मधील तरतुदी रद्द केल्याचा उल्लेख केल्यानंतर मोदींना सर्व उपस्थितांनी उभे राहून मानवंदना दिली. ही मानवंदना भारताची संसद आणि खासदारांसाठी असल्याचे ते म्हणाले. भारतीय राज्यघटनेतील 370 कलमात जम्मू-काश्मीरला स्वतंत्र राज्यघटनेची तात्पुरती तरतुदी होती, 5 ऑगस्ट रोजी हे वादग्रस्त कलम रद्द करण्यात आले आणि जम्मू काश्मीरचे दोन केंद्रशासित प्रदेशांमध्ये विभाजन करण्यात आले. त्या संदर्भाने मोदी बोलत होते. अधिक काम करणाऱ्यांकडून लोकांच्या अपेक्षाही अधिक असतात, असे त्यांनी सांगताच प्रेक्षकांनी भरभरून टाळ्या वाजवल्या. मात्र देशाची संसद आणि खासदारच या कौतुकास पात्र आहेत, असे मोदी म्हणाले. आपल्या भाषणात मोदींनी करतारपूर कॉरिडोर उघडण्याच्या संदर्भातही सांगितले. आता यात्रेकरूंना मुक्तपणे करतारपूर साहिब भेट देता येईल, असे ते म्हणाले. त्यांनी उज्वला योजनेसारख्या आपल्या सरकारच्या कामगिरीवर प्रकाश टाकला. गेल्या पाच वर्षात भारतात झालेल्या बदलांमुळे लोकांनी यावेळी माझ्या सरकारला मोठा जनादेश दिला आहे. 5 ट्रिलियन डॉलर्सची अर्थव्यवस्था होण्यासाठी भारत वचनबद्ध आहे आणि त्यासाठी कठोर परिश्रम करीत असल्याचेही पंतप्रधान म्हणाले.
