Indapur News – इंदापूर बसस्थानकातील अस्वच्छता, अपुऱ्या सुविधा आणि वाढते अतिक्रमण या गंभीर प्रश्नांवर थेट बोट ठेवत परिवहनमंत्री प्रताप सरनाईक यांनी गुरुवारी (दि. ३०) अचानक भेट देत प्रशासनाला चांगलेच धारेवर धरले. त्यांच्या या धडक पाहणीमुळे बसस्थानक व्यवस्थापनात खळबळ उडाली. पुणे–सोलापूर राष्ट्रीय महामार्गावरील महत्त्वाच्या इंदापूर बसस्थानकावर दुपारच्या सुमारास मंत्र्यांचा ताफा अचानक दाखल झाला. कोणतीही पूर्वसूचना नसताना सरनाईक थेट बसस्थानकात उतरले आणि त्यांनी स्वच्छतागृह, पिण्याच्या पाण्याच्या टाक्या, प्रवाशांच्या बसण्याच्या जागा, चालक-वाहकांचे केबिन आदी सर्व सुविधांची सखोल पाहणी केली. पाहणीदरम्यान आढळलेल्या अस्वच्छतेवर त्यांनी तीव्र नाराजी व्यक्त केली. “एकदा संधी देतो; मात्र सुधारणा झाली नाही तर माझ्या पद्धतीने कारवाई करेन,” असा स्पष्ट आणि कठोर इशारा त्यांनी संबंधित अधिकाऱ्यांना दिला. याचबरोबर बसस्थानक परिसरात वाढलेल्या अतिक्रमणावरही त्यांनी संताप व्यक्त केला. तात्काळ अतिक्रमण हटवा, अन्यथा संबंधितांवर गुन्हे दाखल केले जातील, असा इशारा देत त्यांनी प्रशासनाला कठोर भूमिका घेण्याचे निर्देश दिले. दरम्यान, उपस्थित प्रवासी व नागरिकांनी बसस्थानकातील विविध समस्या मंत्र्यांसमोर मांडल्या. या समस्या सोडवण्यासाठीच ही अचानक भेट दिल्याचे सांगत लवकरच सुधारणा घडवून आणण्याचे आश्वासन सरनाईक यांनी दिले. यावेळी आगारप्रमुख हनुमंत गोसावी, शिवसेना शहराध्यक्ष ॲड. आनंद केकाण, अमोल मिसाळ, फिरोज खान पठाण तसेच व्यापारी व नागरिक मोठ्या संख्येने उपस्थित होते. मंत्र्यांच्या या धडक कारवाईमुळे इंदापूर बसस्थानकातील कारभारात आता खरोखरच बदल होणार का? याकडे सर्वांचे लक्ष लागले आहे. प्रवाशांची ठाम अपेक्षा इंदापूर बसस्थानकाच्या स्वच्छतेची जबाबदारी इंदापूर नगर परिषदेकडे दिल्यास संपूर्ण शहराच्या स्वच्छतेला चालना मिळेल, असे प्रवाशांचे मत आहे. बसस्थानक स्वच्छ आणि सुस्थितीत राहिल्यास शहराची प्रतिमा उंचावेल व प्रवाशांना दिलासा मिळेल, अशीही अपेक्षा व्यक्त केली जात आहे.
