प्रभात वृत्तसेवा इंदापूर – इंदापूर नगरपरिषद सार्वत्रिक निवडणूक आता अंतिम टप्प्यात आली असून प्रशासनाकडून तयारीचा पूर्णत: निपटारा झाल्याची माहिती निवडणूक निर्णय अधिकारी सुधाकर मागाडे यांनी दिली. राज्य निवडणूक आयोगाच्या मार्गदर्शक सूचनांनुसार शहरात २७ मतदान केंद्रांची उभारणी पूर्ण झाली आहे. सर्व केंद्रांवर मूलभूत सुविधा, दिव्यांग मतदारांसाठी व्हीलचेअरपासून आवश्यक सोयींची विशेष काळजी घेण्यात आली आहे. महिला सक्षमीकरणाचा प्रत्यय देत आदर्श महिला मतदान केंद्र म्हणून श्री. ना.रा. हायस्कूलच्या दक्षिणाभिमुखी खोली क्र.१० (मतदान केंद्र २/२) येथे सर्व अधिकारी व कर्मचारी महिला असणार आहेत. या २७ केंद्रांवर एकूण २४,८२९ मतदार २ डिसेंबरला मतदान करणार असून निवडणुकीत १० प्रभागांसाठी ५६ उमेदवार,तर नगराध्यक्ष पदासाठी ५ उमेदवार रिंगणात आहेत. संपूर्ण निवडणूक प्रक्रिया पार पाडण्यासाठी सुमारे ३०० अधिकारी व कर्मचाऱ्यांची नेमणूक करण्यात आली असून १९ व २४ नोव्हेंबर रोजी दोन टप्प्यांत त्यांचे प्रशिक्षण पूर्ण झाले आहे.मतदान साहित्याचे वाटप आणि स्वीकृतीसाठी कालठण रोडवरील शासकीय धान्य गोडाऊन येथे केंद्र उभारण्यात आले असून पोलिसांकडून कडेकोट बंदोबस्त ठेवण्यात आला आहे. राजकीय प्रतिनिधींच्या उपस्थितीत सर्व मतदान यंत्रे (इव्हीएम) तयार करून स्ट्रॉगरूममध्ये सुरक्षित ठेवण्यात आली आहेत. इतर कोणालाही परिसरात प्रवेश नाही मतमोजणी ३ डिसेंबर २०२५ रोजी याच गोडाऊनमध्ये होणार असून त्यासाठी ८५ अधिकारी-कर्मचारी नेमण्यात आले आहेत. अधिकृत ओळखपत्र असणाऱ्या अधिकारी, कर्मचारी, उमेदवार व त्यांचे प्रतिनिधी यांनाच प्रवेश देण्यात येणार असून इतर कोणालाही परिसरात प्रवेश नाही,असा स्पष्ट इशारा प्रशासनाने दिला आहे, अशी माहिती सहायक निवडणूक निर्णय अधिकारी व इंदापूर नगरपरिषदेचे मुख्याधिकारी रमेश ढगे यांनी दिली.
