बर्मिंगहॅम – भारत आणि इंग्लंड यांच्यातील कसोटी मालिकेतील शेवटचा आणि पाचव्या सामना एजबॅस्टन मैदानावर होणार आहे. या सामन्यात इंग्लंडचा फलंदाज ओली पोप हेल्मेटवर कॅमेरा लावून मैदानात उतरणार आहे. आयसीसीनेही त्याला तशी परवानगी देखील दिली आहे.

हेल्मेटमध्ये कॅमेरा लावून क्रिकेटर मैदानात उतरण्याची ही पहिलीच वेळ असेल. आंतरराष्ट्रीय क्रिकेमध्ये हेल्मेटला कॅमेरा लावून मैदानात उतरणारा ओली पोप हा पहिलाच क्रिकेटर ठरणार आहे. पोप शॉर्ट लेगवर किंवा फलंदाजाच्या जवळपास फिल्डिंग करताना कॅमेरा असलेले हेल्मेट घालणार आहे. फिल्डिंगदरम्यानच तो हा कॅमेरा लावू शकतो.

इंग्लंडमधील सामन्याचे प्रसारण करणाऱ्या स्कायस्पोर्ट्स या वाहिनीचा हा नवा प्रयोग आहे. याद्वारे फलंदाजाजवळ उभे राहून क्षेत्ररक्षण करणे किती कठीण असते हे प्रेक्षकांना दाखविण्याचा प्रयत्न केला जाणार आहे. तसेच, चेंडू किती वेगाने येतो आणि क्षेत्ररक्षकाला झेल घेण्यासाठी किती कमी वेळ मिळतो, हेही प्रेक्षकांना सांगण्याचा प्रयत्न असणार आहे. यासाठी आयसीसी आणि ईसीबीनेही परवानगी दिली आहे. ओली पोपच्या हेल्मेटवर लावलेला हा कॅमेरा मैदानावरील आवाज रेकॉर्ड करू शकत नाही. दरम्यान आवाजासाठी पहिल्यापासून स्टम्प माईकचा वापर केला जातो.

शॉर्ट लेगवर क्षेत्ररक्षण करणे खूपच धोकादायक

शॉर्ट लेग किंवा बॅट्समनच्या जवळ असलेल्या इतर कोणत्याही पोझिशनवर क्षेत्ररक्षण करणे खूप कठीण आणि धोकादायक असते. याच कारणामुळे अनेकदा या ठिकाणी संघातील सर्वात तरुण किंवा नवा खेळाडूलाच त्या ठिकाणी क्षेत्ररक्षणासाठी पाठवले जाते. शॉर्ट लेगवर क्षेत्ररक्षण करताना खेळाडूला दुखापत होण्याची शक्यता खूप जास्त असते, कारण जेव्हा जेव्हा फलंदाज त्या दिशेने शॉट खेळतो तेव्हा चेंडू खूप वेगाने क्षेत्ररक्षकाकडे येतो. या कारणास्तव, संघातील सर्वात महत्त्वाचे फलंदाज किंवा गोलंदाज या ठिकाणी सहसा क्षेत्ररक्षणासाठी पाठवले जात नाहीत, कारण त्यांना दुखापत झाल्यास संघ अडचणीत येऊ शकतो.