IND vs AUS ODI Series : टीम इंडियाचे दोन दिग्गज फलंदाज, रोहित शर्मा आणि विराट कोहली, सुमारे सात महिन्यांनंतर पुन्हा भारतीय एकदिवसीय संघात परतले आहेत. ऑस्ट्रेलिया दौऱ्यासाठी या दोघांची संघात निवड झाली आहे. मात्र, हा दौरा त्यांच्या कारकीर्दीचा शेवटचा टप्पा ठरू शकतो, असा प्रश्न निर्माण झाला आहे. याचे कारण म्हणजे, भारतीय क्रिकेट व्यवस्थापनाने 2027 च्या विश्वचषकासाठी तयारी सुरू केली असून, या दोन्ही खेळाडूंना त्यात स्थान नसल्याची शक्यता आहे. विशेष म्हणजे, रोहितकडून एकदिवसीय संघाचे कर्णधारपद काढून घेण्यात आले असून, गिलला ही जबाबदारी सोपवण्यात आली आहे. गंभीर-अगरकर यांचा गुप्त प्लॅन उघड – 19 ऑक्टोबरपासून ऑस्ट्रेलियाविरुद्ध सुरू होणाऱ्या तीन सामन्यांच्या एकदिवसीय मालिकेला रोहित आणि कोहली यांच्या कारकीर्दीचा अखेरचा टप्पा मानले जात आहे. ‘टेलीग्राफ’च्या अहवालानुसार, भारतीय क्रिकेट मंडळाचे मुख्य समितीचे अध्यक्ष अजित अगरकर आणि मुख्य प्रशिक्षक गौतम गंभीर यांनी एक गुप्त रणनीती आखली आहे. या रणनीतीनुसार, या दोन दिग्गज खेळाडूंना हळूहळू निवृत्तीच्या दिशेने ढकलले जाणार आहे. या योजनेला क्रिकेट मंडळाच्या वरिष्ठ अधिकाऱ्यांनी हिरवा कंदील दाखवला आहे. 2027 विश्वचषकात सहभाग अनिश्चित – 2027 मध्ये दक्षिण आफ्रिकेत होणाऱ्या एकदिवसीय विश्वचषकासाठी भारतीय संघाच्या योजनेत रोहित आणि कोहली यांना स्थान नसल्याचे अहवालात म्हटले आहे. त्या वेळी रोहित 40 वर्षांचा असेल, तर कोहली 39 वर्षांचा असेल. दोन्ही खेळाडूंनी टी-20 आणि कसोटी क्रिकेटमधून निवृत्ती घेतली असून, सतत क्रिकेट खेळणे त्यांच्यासाठी आव्हानात्मक ठरत आहे. दुसरीकडे, संघात युवा खेळाडूंची मोठी रांग आहे. आगरकर आणि गंभीर यांनी यापूर्वीच एक गुप्त योजना तयार केली आहे, ज्यामुळे शुबमन गिलला एकदिवसीय संघाचे कर्णधारपद देण्याचा निर्णय घेण्यात आला. इंग्लंड दौऱ्यावरील नव्या कसोटी कर्णधाराच्या यशाने या योजनेला आणखी बळ मिळाले आहे. हेही वाचा – Hikaru Nakamura Controversy : हिकारू नाकामुराने का फेकला डी गुकेशचा किंग? संपूर्ण सत्य आलं समोर ऑस्ट्रेलिया दौऱ्यावर भवितव्य अवलंबून – रोहित आणि कोहली यांना या योजनेबाबत यापूर्वीच माहिती देण्यात आल्याचे सांगितले जाते. ऑस्ट्रेलिया दौऱ्यानंतर भारत नोव्हेंबर-डिसेंबरमध्ये दक्षिण आफ्रिकेविरुद्ध तीन एकदिवसीय सामने खेळणार आहे, तसेच जानेवारीमध्ये न्यूझीलंडविरुद्धही तीन सामने खेळणार आहे. या दौऱ्यांमध्ये रोहित आणि कोहली यांचा समावेश होईल की नाही, हे त्यांच्या ऑस्ट्रेलिया दौऱ्यावरील कामगिरीवर अवलंबून असेल. या दौऱ्याकडे सर्वांचे लक्ष लागले आहे, कारण हा दौरा केवळ भारतीय संघाच्या भविष्यासाठीच नव्हे, तर रोहित शर्मा आणि विराट कोहली यांच्या शानदार कारकीर्दीच्या भवितव्यासाठीही महत्त्वाचा ठरणार आहे.
