Ind vs Aus Live Score – भारत विरुद्ध ऑस्ट्रेलिया एकदिवसीय आंतरराष्ट्रीय क्रिकेट मालिकेच्या दुसऱ्या सामन्यात आज भारतीय फलंदाजांनी पाहुण्या संघाच्या गोलंदाजांची येथेच्छ धुलाई केली. ऋतुराज गायकवाड वगळता सर्वच भारतीय फलंदाजांनी ऑस्ट्रेलियन गोलंदाजांना धु-धु धुतलं. सलामीवीर ऋतुराज लवकर तंबूत परतल्यानंतर श्रेयस अय्यर फलंदाजीसाठी मैदानात आला. शुभमन गिलसोबत त्याने धावांची गती वाढवत वेगवान खेळ केला.

शुभमन (१०४) व श्रेयस (१०५) या दोघांनीही आपली शतकं साजरी करत, मोठ्या धावसंख्येचा पाया रचला. मैदानात जम बसलेले दोन्ही फलंदाज एकामागून एक बाद झाल्यानंतर फलंदाजीसाठी आलेल्या कर्णधार के एल राहुलने ईशान किशनसोबत महत्वपूर्ण भागीदारी केली. ईशान किशनने २ चौकार व २ षटकार खेचत १८ चेंडूत ३१ धावा केल्या. मैदानावर तो सेट होतोय असं वाटत असतानाच झाम्पाने त्याचा बळी घेतला.

त्यानंतर पाचव्या क्रमांकावर फलंदाजीसाठी आलेल्या सूर्यकुमारने पाहुण्या संघाच्या गोलंदाजांना अक्षरशः सळो की पळो करून सोडले. आपल्या खास शैलीमध्ये मैदानाच्या प्रत्येक कानाकोपऱ्यात चेंडू टोलवण्यासाठी मिस्टर ३६० अशी बिरुदावली मिळालेल्या सूर्यकुमारने आजही ती सार्थ ठरवली. त्याने अवघ्या ३७ चेंडूंमध्ये ७२ धावा केल्या. यामध्ये ६ षटकार व ६ चौकारांचा समावेश होता.

सूर्यकुमारचा झंझावात सुरु असतानाच दुसऱ्या बाजूने के एल राहुलने मोलाची साथ दिली. राहुलने ३८ चेंडूंमध्ये ५२ धावा केल्या. राहुल बाद झाल्यानंतर मैदानात आलेल्या जडेजाने ९ चेंडूत १३ धावांचे योगदान दिले. शुभमन व श्रेयस यांची शतकी खेळी, कर्णधार के एल राहुलचे अर्धशतक, ईशान किशनची छोटी पण तडाखेबंद खेळी व अखेरीस सूर्यकुमार यादवचे वादळ यांमुळे भारतीय संघाने ३९९ धावांचा डोंगर उभारला. पाहुण्यांना विजयासाठी ४०० धावांचे कठीण लक्ष्य पार करावे लागणार आहे.

ऑस्ट्रेलियाचा तो विक्रम मोडला   

भारत विरुद्ध ऑस्ट्रेलिया सामन्यात सर्वाधिक धावांचा विक्रम आजपर्यंत ऑस्ट्रेलियाच्या नावावर होता. २०२०मध्ये सिडनी येथे झालेल्या सामन्यात ऑस्ट्रेलियाने ३८९ धावा केल्या होत्या. भारतीय फलंदाजांनी आज हा विक्रम मोडला असून आज भारतीय संघाने केलेल्या ३९९ धावा सर्वोच्च ठरल्या आहेत. भारतीय गोलंदाज ऑस्ट्रेलियाला मागील सामन्याप्रमाणे स्वस्तात गुंडाळून हा विक्रम भारताच्या नावावर कायम ठेवणार की ऑस्ट्रेलियन फलंदाज ३९९ धावांचे लक्ष्य गाठून पुन्हा एकदा वरचढ ठरणार हे पुढच्या काही तासांमध्ये स्पष्ट होणार आहे.

धावफलक     

16/1 (आर. गायकवाड, 3.4 ओव्ह) · 216/2 (एस. अय्यर, 30.5 ओव्ह) · 243/3 (एस. गिल, 34.5 ओव्ह) · 302/4 (आय. किशन, 40.2 ओव्ह) · 355/ ५ (केएल राहुल, ४५.६ ओव्ह)