India vs Australia 3rd T20 : भारत आणि ऑस्ट्रेलिया यांच्यातील पाच सामन्यांच्या टी-20 मालिकेतील तिसरा सामना आज गुवाहाटी येथे खेळवला जातोय. सूर्यकुमार यादवच्या नेतृत्वाखाली टीम इंडियाला आज मालिका विजयाची संधी असणार आहे. मात्र, त्याआधी एक बातमी समोर येत आहे. टीम इंडियाचा युवा गोलंदाज मुकेश कुमार आजच्या सामन्यासाठी संघामधून बाहेर झाला आहे. स्वत: मुकेश कुमारने संघातून बाहेर होण्याची विनंती बीसीसीआयला (BCCI) केली होती.  त्याचं नेमकं काय कारण आहे, ते जाणून घेऊया…

दरम्यान, भारताचा स्टार वेगवान गोलंदाज मुकेश कुमार विवाहबंधनात अडकणार आहे. भारत आणि ऑस्ट्रेलिया यांच्यातील 5 सामन्यांच्या T20 मालिकेतील तिसऱ्या सामन्यापूर्वी मुकेशने बीसीसीआयकडून लग्नासाठी सुट्टी घेतली आहे. मुकेशच्या जागी दीपक चहरला संघात स्थान देण्यात आले आहे. तथापि, रायपूर येथे शुक्रवार, 1 डिसेंबर रोजी खेळल्या जाणाऱ्या चौथ्या टी-20 सामन्यात मुकेश पुनरागमन करेल.

गुवाहाटी येथे ऑस्ट्रेलियाविरुद्ध खेळल्या जात असलेल्या तिसऱ्या सामन्यात मुकेश कुमारच्या जागी आवेश खानला प्लेईंग इलेव्हनमध्ये स्थान देण्यात आले आहे. याआधी मुकेशचा पहिल्या दोन्ही टी-20 मध्ये प्लेईंग इलेव्हनमध्ये समावेश करण्यात आला होता.

बीसीसीआय BCCI ने दिलं स्पष्टीकरण…

बीसीसीआयने मुकेश कुमारच्या संदर्भात निवेदन जारी करून म्हटले आहे की, “वेगवान गोलंदाज मुकेश कुमारने बीसीसीआयला ऑस्ट्रेलियाविरुद्धच्या तिसऱ्या टी-20 सामन्यापूर्वी संघातून मुक्त करण्याची विनंती केली. मुकेशचे लग्न होत आहे आणि लग्नाच्या उत्सवाच्या कालावधीसाठी त्याला रजा मंजूर करण्यात आली आहे. रायपूर येथे होणाऱ्या चौथ्या T20 सामन्यापूर्वी तो संघात सामील होईल. मालिकेतील उर्वरित सामन्यांसाठी वेगवान गोलंदाज दीपक चहरचा संघात समावेश करण्यात आला आहे.”

Update: Fast bowler Mukesh Kumar made a request to BCCI to be released from India’s squad ahead of the third T20I against Australia in Guwahati. Mukesh is getting married and has been granted leave for the duration of his wedding festivities.

He will join the squad ahead of the…

— BCCI (@BCCI) November 28, 2023

कोण आहे मुकेश कुमारची पत्नी ?

एका प्रसिद्द वृत्तपत्राच्या बातमी नुसार, मुकेश कुमारचे लग्न गोरखपूरमध्ये होणार आहे. मुकेशची भावी पत्नी छपराच्या बनियापूर बेरूई गावची रहिवासी असून तिचे नाव दिव्या सिंह आहे.

भारतासाठी तिन्ही फॉरमॅटमध्ये केले आहे पदार्पण…

विशेष म्हणजे मुकेश कुमारने भारतासाठी तिन्ही फॉरमॅटमध्ये पदार्पण केले आहे. त्याने जुलैमध्ये वेस्ट इंडिजविरुद्ध कसोटी आणि नंतर वनडे पदार्पण केले. यानंतर त्याने ऑगस्टमध्ये वेस्ट इंडिजविरुद्ध टी-20 आंतरराष्ट्रीय सामन्यात प्रवेश केला. आतापर्यंत त्याने 1 कसोटी, 3 एकदिवसीय आणि 7 टी-20 आंतरराष्ट्रीय सामने खेळले आहेत. त्याने एकमेव कसोटीत 2 विकेट्स घेतल्या आहेत. याशिवाय त्याने एकदिवसीय आणि टी-20 आंतरराष्ट्रीय सामन्यांमध्ये प्रत्येकी 4 विकेट घेतल्या आहेत.