Income Tax Refund: आयकर विभागाने करदात्यांना परतावा जारी केला आहे. परंतु, काही करदाते अजूनही परताव्याच्या प्रतीक्षेत आहेत. गेल्या काही वर्षांत, विशेषत: नवीन प्राप्तिकर पोर्टल सुरू झाल्यानंतर, प्राप्तिकर परताव्याच्या प्रक्रियेस खूपच कमी वेळ लागत आहे. ज्या आयटीआरमध्ये कोणताही परतावा मिळत नाही त्यावर काही तासांत प्रक्रिया केली जाते. परंतु, जास्त परतावा रक्कम असलेल्या प्रकरणांमध्ये अधिक वेळ लागतो. काही प्रकरणांमध्ये यास काही महिने लागू शकतात.

तुमचा परतावा (इन्कम टॅक्स रिफंड) अजून आला नसेल, तर ते प्रक्रियेला उशीर झाल्यामुळे असू शकते. रिटर्नमधील चूक सुधारण्यास सांगणारी आयकर विभागाची नोटीस तुम्ही पाहिली नसण्याचीही शक्यता आहे. परताव्याच्या प्रतीक्षेत असलेले करदाते पुढील पावले उचलू शकतात:

1. तुमच्या आयकर खात्यात लॉग इन करा. तुम्ही लॉग-इन आयडी म्हणून पॅन वापरू शकता. तुम्ही तुमच्या नेट-बँकिंग खात्याद्वारे आयकर पोर्टलवर देखील लॉग इन करू शकता.

2. तुमच्या आयकर रिटर्नची स्थिती तपासा. जर ही प्रक्रिया अद्याप झाली नसेल तर याचा अर्थ असा आहे की आपल्याला आणखी काही काळ प्रतीक्षा करावी लागेल.

3. जर तुमच्या रिटर्नवर प्रक्रिया केली गेली असेल, तर त्याचा अर्थ असा आहे की काही दिवसात तुमच्या बँक खात्यात परताव्याची रक्कम यायला हवी.

4. जर तुम्हाला हा संदेश दिसत असेल – ‘बँक प्रमाणीकरणामुळे (Validation) परतावा अयशस्वी झाला’ तर याचा अर्थ तुम्हाला तुमचे बँक खाते प्रमाणित करावे लागेल.

5. जर तुम्हाला कलम 143(1) अंतर्गत सूचना प्राप्त झाली असेल आणि परतावा तुम्ही दावा केलेल्या रकमेपेक्षा कमी असेल, तर याचा अर्थ असा की काही वजावट नाकारण्यात आली आहे किंवा तुमच्या 26AS मध्ये कोणतेही कर क्रेडिट उपलब्ध नाही. अशा परिस्थितीत, माहिती दुरुस्त केल्यानंतर, तुम्हाला दुरुस्तीची विनंती दाखल करावी लागेल. मदतीसाठी तुम्ही तुमच्या चार्टर्ड अकाउंटंट किंवा कर सल्लागाराशी बोलू शकता.

6. जर तुम्ही तुमचे इन्कम टॅक्स रिटर्न सत्यापित (Validation) केले नसेल तर तुम्ही ते त्वरित सत्यापित करावे. हे काम तुम्ही ऑनलाइन किंवा ऑफलाइन करू शकता. जर तुम्ही रिटर्न भरल्यापासून ३० दिवसांच्या आत सेंट्रल प्रोसेसिंग सेंटरला (CPC) स्वाक्षरी केलेले ITR-V पाठवले असेल आणि स्थिती अपडेट केली नसेल, तर तुम्हाला इन्कम टॅक्स पोर्टलवर तक्रार दाखल करावी लागेल. आयटीआर दाखल करण्याची प्रक्रिया केवळ तेव्हाच पूर्ण मानली जाते जेव्हा ती सत्यापित केली जाते. जर तुम्ही तुमचा ITR फाईल केल्याच्या ३० दिवसांच्या आत पडताळला नाही तर तुम्हाला समस्यांना सामोरे जावे लागेल.