सांगली – मागील काही दिवसांपासून लाच घेण्याचे प्रमाण मोठ्या प्रमाणात वाढल्याचं दिसत आहे. त्याचवेळी लाचलुचपत प्रतिबंधक विभाग देखील सक्रिय झाला आहे. सांगलीत शिक्षकाची व त्याच्या दोन सहकाऱ्यांची पदवीधर वेतनश्रेणी मान्यता करून देण्याच्या मोबदल्यात एक लाख 70 हजार रुपयांची लाच स्वीकारताना जिल्हा परिषदेच्या माध्यमिक शिक्षण विभागाचे शिक्षणाधिकारी व अधीक्षकांना लाचलुचपत प्रतिबंधक विभागाने रंगेहाथ पकडले.

शिक्षणाधिकारी विष्णू मारुतीराव कांबळे (वय 58, रा. विश्रामबाग सांगली) व अधीक्षक विजयकुमार अशोक सोनवणे ( वय ४१, रा. अहिल्यानगर कुपवाड) अशी आरोपींची नावे आहेत. शुक्रवारी रात्री उशिरा लाचलुचपत प्रतिबंधक विभागाने ही कारवाई केली.

तक्रारदार व त्याच्या दोन शिक्षक मित्रांचे पदवीधर वेतन श्रेणी मान्यताबाबतचे काम माध्यमिक शिक्षण विभागाकडे होते. मात्र आरोपी कांबळे आणि सोनवणे यांनी तिघांकडे प्रत्येकी 60 हजार म्हणजे एकूण 1 लाख 80 हजार रुपयांची मागणी केली. मात्र अखेरीस 1 लाख 70 हजार रुपयांत ठरल होतं. त्यानंतर तिघा शिक्षकांनी 24 एप्रिल रोजी लाचलुचपत प्रतिबंधक विभागाकडे तक्रार दिली होती.

दरम्यान अधीक्षक सोनवणे यांनी तक्रारदारांकडून लाचेची रक्कम स्वीकारली. ती रक्कम शिक्षण अधिकारी कांबळे यांना दिल्यानंतर दोघांना लाचलुचपत प्रतिबंधक विभागाने कांबळे यांच्या राहते घरी अटक केली. लाच लुचपत प्रतिबंधक अधिनियमानुसार दोघांवर गुन्हा दाखल करण्याची प्रक्रिया विश्रामबाग पोलीस ठाण्यात सुरू आहे.