Ketan Aggarwal : मावळ तालुक्यातील लोहगड किल्ल्यावर होणाऱ्या पत्नीच्या वाढदिवसानिमित्त ट्रेकिंगसाठी गेलेल्या एका 26 वर्षीय तरुणाचा सुमारे 400 फूट खोल दरीत पडून दुर्दैवी मृत्यू झाला. लग्नाच्या स्वप्नांना आकार येण्याआधीच मृत्यूने त्याला गाठल्याने दोन्ही कुटुंबांवर दु:खाचा डोंगर कोसळला आहे. ही हृदयद्रावक घटना गुरुवारी सकाळी साडेदहा वाजण्याच्या सुमारास घडली.

मृत तरुणाचे नाव केतन विशाल अग्रवाल (वय 26, लोढा बेलमोंडो सोसायटी, गहुंजे, ता. मावळ) असे आहे. केतनच्या पश्चात आई-वडील, बहीण, दोन चुलते आणि दोन चुलतभाऊ असा परिवार आहे. त्याचे वडील विशाल अग्रवाल हे नामांकित बांधकाम व्यावसायिक असून केतनदेखील बांधकाम क्षेत्रात कार्यरत होता.

पोलिसांनी दिलेल्या माहितीनुसार, केतन आपल्या होणाऱ्या पत्नीसोबत कारने लोहगड येथे आला होता. वाढदिवसाचे औचित्य साधत दोघांनी ट्रेकिंगला सुरुवात केली. किल्ल्यावर ट्रेक करत असताना एका कड्यावरून अचानक त्याचा तोल गेला आणि तो 400 फूट खोल दरीत कोसळला. त्याला गंभीर दुखापत झाल्याने त्याचा मृत्यू झाला. या दुर्वेदी घटनेने हळहळ व्यक्त केली जात आहे.

हेही वाचा : Dimbhe Dam: डिंभे धरण आटले! गतवर्षी १४ टक्के, यंदा अवघा २.५९% साठा; आंबेगाव तालुक्यावर पाणीसंकट

घटनेची माहिती मिळताच लोणावळा ग्रामीण पोलिसांचे पथक घटनास्थळी दाखल झाले. त्यानंतर शिवदुर्ग मित्र आपत्कालीन पथकाला पाचारण करण्यात आले. पथकातील सदस्यांनी तब्बल तीन तास अथक प्रयत्न करून घनदाट झाडीत अडकलेला केतनचा मृतदेह बाहेर काढला आणि गडाच्या पायथ्यापर्यंत आणला. सायंकाळी उशिरा निगडी येथे शोकाकुल वातावरणात त्याच्यावर अंत्यसंस्कार करण्यात आले.

विवाहाची जय्यत तयारी

दरम्यान, केतन आणि त्याच्या होणाऱ्या पत्नीच्या विवाहाची तयारी दोन्ही कुटुंबीयांकडून जोरात सुरू होती. राजस्थानमधील उदयपूर येथे भव्य विवाहसोहळ्याचे नियोजन करण्यात आले होते. यासाठी तब्बल 14 कोटी रुपये खर्चून आलिशान महाल बुक करण्यात आला होता. तसेच पाहुण्यांच्या प्रवासासाठी दोन स्वतंत्र विमानांचीही व्यवस्था करण्यात आली होती. मात्र, आनंदोत्सवाची तयारी सुरू असतानाच घडलेल्या या दुर्दैवी घटनेमुळे दोन्ही कुटुंबांवर मोठा आघात झाला आहे.

हेही वाचा : Bhimashankar Temple: भाविकांना मोठा दिलासा! भीमाशंकरला ‘या’ वेळेत मिळणार थेट दर्शन; ऑनलाईन नोंदणीची कटकट संपली