Sooraj Pancholi : दिवंगत अभिनेता सुशांत सिंह राजपूतची माजी मॅनेजर दिशा सालियन हिच्या मृत्यू प्रकरणात केंद्रीय अन्वेषण ब्युरोने (CBI) मोठं पाऊल उचललं आहे. दिशा सालियनचे वडील सतीश सालियन यांनी तिचा मृत्यू आत्महत्या नसून हत्या असल्याचा दावा केला होता. या प्रकरणात CBIने सतीश सालियन यांचा जबाब नोंदवल्यानंतर गुन्हा दाखल केला आहे.

CBIने दाखल केलेल्या FIRमध्ये काही बड्या नावांचा समावेश असल्याचा दावा दिशाच्या वडिलांचे वकील निलेश ओझा यांनी केला आहे. त्यांनी दिलेल्या माहितीनुसार, शिवसेना (UBT) नेते आदित्य ठाकरे, अभिनेता सूरज पांचोली, रोहन रॉय, रिया चक्रवर्ती आणि माजी पोलीस आयुक्त परमबीर सिंग यांची नावे FIRमध्ये आहेत. मात्र, या व्यक्तींविरोधातील आरोप आणि त्यांची कायदेशीर स्थिती तपास यंत्रणेच्या अधिकृत निष्कर्षांवरच निश्चित होईल.

दरम्यान, आपलं नाव या प्रकरणाशी जोडलं गेल्यानंतर अभिनेता सूरज पांचोलीने सोशल मीडियावर पोस्ट करत स्पष्टीकरण दिलं आहे. सूरजने दिशाला आपण कधीही भेटलो नसल्याचा दावा केला असून या प्रकरणाशी आपला कोणताही संबंध नसल्याचं स्पष्ट केलं आहे.

सूरज पांचोलीने आपल्या पोस्टमध्ये म्हटलं आहे की, “गेल्या काही वर्षांपासून विविध मीडिया रिपोर्ट्स आणि वक्तव्यांमधून दिशा सालियनच्या मृत्यू प्रकरणात त्याचं नाव जोडण्यात येत आहे. मात्र, दिशाला आपल्या आयुष्यात प्रत्यक्ष किंवा अप्रत्यक्षपणे कधीही भेटलो नाही. तसेच आदित्य ठाकरे यांनाही आपण कधी भेटलो नाही, असा दावा त्याने केला आहे.

 

View this post on Instagram

 

A post shared by Sooraj P (@soorajpancholi)

‘ज्या गोष्टीशी माझा काहीही संबंध नाही, त्यात माझं नाव ओढलं जाणं चुकीचं आणि अत्यंत त्रासदायक आहे. विशेषतः मला या प्रकरणाशी जोडणारा कोणताही पुरावा किंवा दाखला नसताना अशा प्रकारे माझं नाव घेतलं जात आहे,’ असं सूरजने म्हटलं आहे.

आपण तपास यंत्रणांना पूर्ण सहकार्य करणार असल्याचंही सूरज पांचोलीने स्पष्ट केलं आहे. दिशा सालियनच्या मृत्यूच्या परिस्थितीची निष्पक्ष आणि सखोल चौकशी व्हावी, याला आपला पूर्ण पाठिंबा असल्याचं त्याने सांगितलं.

‘सोशल मीडियावर दिसणाऱ्या प्रत्येक गोष्टीवर विश्वास ठेवू नका. मथळे म्हणजे पुरावा नाहीत आणि वादविवाद म्हणजेही पुरावा नाही. माझा कायद्यावर विश्वास आहे, तपास यंत्रणांवर विश्वास आहे आणि सत्य समोर येईल, असा मला विश्वास आहे.’ असं सूरजने आपल्या पोस्टमध्ये म्हटलं आहे.

नेमकं काय आहे दिशा सालियन प्रकरण?

दिशा सालियनचा ९ जून २०२० रोजी मुंबईतील मालाड परिसरातील एका इमारतीच्या १२व्या मजल्यावरून पडून मृत्यू झाला होता. त्या वेळी पोलिसांनी या घटनेची नोंद अपघाती मृत्यू म्हणून केली होती. मात्र, कालांतराने दिशा सालियनच्या मृत्यूबाबत विविध प्रश्न उपस्थित झाले आणि तिच्या कुटुंबीयांकडूनही वेगवेगळे दावे करण्यात आले.

Ganeshotsav : ‘ दैनिक प्रभात’ कार्यालयात बाप्पा विराजमान; विधीवत प्राणप्रतिष्ठा, चैतन्यमय वातावरण