गोंदवले  –“जेथे नाम तेथे माझे प्राण’, हे श्री ब्रह्मचैतन्य गोंदवलेकर महाराजांचे बोल आपल्या कलाकृतीतून प्रत्यक्षात साकारण्याची किमया भक्‍त प्रशांत कुलकर्णी यांनी केली आहे. विविधरंगी कापडाच्या नाड्यांपासून “श्रीराम जयराम जय जय राम’ हा मंत्र 72 वेळा लिहून त्यातून चक्‍क गोंदवलेकर महाराजांची छबी साकारण्यात आली आहे. महाराजांच्या पुण्यतिथी महोत्सवात या छबीसमोर भविक नतमस्तक होत आहेत.

गोंदवले बुद्रुक, ता. माण येथे श्री ब्रह्मचैतन्य गोंदवलेकर महाराजांचा पुण्यतिथी महोत्सव समाधी मंदिरात सुरू आहे. यानिमित्त धार्मिक, अध्यात्मिक कार्यक्रम सुरू आहेत. त्याचबरोबर हा महोत्सव कलाकारांनाही आपली सेवा श्रीचरणी रुजू करण्यासाठी आगळावेगळा ठरला आहे. श्रींच्या कोठी पूजनावेळी भांडी, फळे व भाज्यांची आरास, समाधी मंदिरासमोर काढण्यात आलेल्या भव्य रांगोळीतून कलाकारांनी आपली श्रद्धा व्यक्‍त केली. गायन व कीर्तनाच्या माध्यमातूनही प्रख्यात कलाकार श्रींची सेवा करत आहेत.

चिंचवड (पुणे) येथील भक्‍त प्रशांत कुलकर्णी हेदेखील आपल्या कलेतून दरवर्षी आगळ्यावेगळ्या पद्धतीने सेवा करत आहेत. कुलकर्णी यांनी यंदा श्रीराम नामाच्या मंत्रातून महाराजांची प्रतिमा हुबेहूब साकारली आहे. त्यासाठी त्यांनी विविधरंगी कापडाच्या नाड्यांचा वापर केला आहे. “श्रीराम जयराम जय जय राम’ हा 13 अक्षरी मंत्र महाराजांनी दिला आहे. हा मंत्र 72 वेळा आगळ्या पद्धतीने वापरून त्यांनी महाराजांची प्रतिमा साकारली आहे.

ही कलाकृती साकारण्यासाठी त्यांना तीन महिने लागले. त्यांनी सुरुवातीला विविधरंगी पेन्सिल्सचा वापर करून सध्या कागदावर सराव केला. छोट्या छबीपासून मोठ्या छबी तयार करून अंदाज घेतला आणि नंतर कापडाच्या नाड्यांपासून महाराजांची छबी तीन महिन्यात साकारली.

पुण्यतिथी महोत्सवाच्या पूर्वसंध्येला मंदिर समितीच्या विश्‍वस्तांच्या हस्ते या प्रतिमेचे अनावरण करण्यात आले. श्रींच्या समाधीच्या दर्शनाबरोबरच ही कलाकृती पाहण्यासाठी भाविकांची गर्दी होत आहे. प्रशांत कुलकर्णी हे दरवर्षी पुण्यतिथी महोत्सवात महाराजांच्या प्रतिमा विविध प्रकारे साकारतात. यापूर्वी त्यांनी कफनीच्या कापडाच्या गुंडाळ्यातून, मक्‍याच्या कणसातून, खजुरांचा वापर करून श्रींची प्रतिमा साकारली होती. श्री ब्रह्मानंद मंडपातील व्यासपीठावर मण्यांच्या साह्याने साकारलेली गोंदवलेकर महाराज, संत रामदास स्वामी व श्री हनुमान यांची त्रिमितीय कलाकृतीही कुलकर्णी यांनीच केली आहे. त्यांच्या छंदातून भाविकांना श्रींची विविध रूपे पाहायला मिळत आहेत.