Illegal Liquor Raid – थेऊर परिसरात अवैध मद्यविक्रीविरोधात पोलिसांनी सलग दोन दिवसांत धडक कारवाया करत तीन वेगवेगळ्या ठिकाणी छापे टाकले. या कारवाईत गावठी हातभट्टीची दारू व ताडी जप्त करण्यात आली असून एका महिलेसह दोन पुरुषांना ताब्यात घेऊन त्यांच्यावर महाराष्ट्र दारूबंदी कायद्यानुसार गुन्हे दाखल करण्यात आले आहेत. देविदास माणिक दराडे (वय 37), बसवराज नरसय्या भंडारी (वय 44) व सारिका बापू सकट अशी आरोपींची नावे आहेत. याप्रकरणी पोलीस अंमलदार प्रमोद बबन टिळेकर यांनी सरकारच्या वतीने लोणी काळभोर पोलीस ठाण्यात फिर्याद दिली आहे. गुन्हे शाखा युनिट-6च्या पथकाने 24 मार्च रोजी फ्लश आऊट ऑपरेशन अंतर्गत थेऊर येथील भिल्लवस्ती परिसरात छापा टाकला. या कारवाईत देविदास दराडे याच्याकडून सुमारे 25 लिटर गावठी हातभट्टीची दारू व 150 रुपयांची रोख रक्कम असा एकूण 2,650 रुपयांचा मुद्देमाल जप्त करण्यात आला. पंचांसमक्ष नमुना जप्त करून उर्वरित दारू जागीच नष्ट करण्यात आली. यानंतर 25 मार्च रोजी लोणी काळभोर पोलीस ठाण्याच्या पथकाने थेऊर रोडवरील कांबळे वस्ती परिसरात छापा टाकून बसवराज भंडारी याला अवैधरित्या ताडी विक्री करताना पकडले. त्याच्याकडून सुमारे 40 लिटर ताडी जप्त करण्यात आली असून नमुना सीलबंद करून उर्वरित ताडी नष्ट करण्यात आली. त्याच दिवशी रात्री उशिरा थेऊर येथील बंद असलेल्या यशवंत हॉस्पिटलच्या कंपाऊंडजवळ आणखी एक कारवाई करण्यात आली. येथे सारिका सकट या महिलेला दोन प्लास्टिक कॅनमधून हातभट्टी दारू विक्री करताना रंगेहाथ पकडण्यात आले. तिच्याकडून सुमारे 15 लिटर तयार दारू जप्त करून नमुना तपासणीसाठी पाठविण्यात आला. दरम्यान, तिन्ही कारवायांमध्ये जप्त मुद्देमाल पंचनामा करून ताब्यात घेण्यात आला असून सर्व आरोपींविरुद्ध महाराष्ट्र दारूबंदी कायदा कलम 65(ई) अन्वये गुन्हे दाखल करण्यात आले आहेत. पुढील तपास लोणी काळभोर पोलीस करीत आहेत.
