Shweta Tiwari’s question to Raj Thackeray : लोकप्रिय टेलिव्हिजन अभिनेत्री श्वेता तिवारी सध्या सोशल मीडिया पोस्टमुळे चर्चेत आली आहे. ऑनलाइन ऑर्डर केलेल्या खाद्यपदार्थात झुरळ आढळल्याचा दावा करत श्वेताने याप्रकरणी एफडीए प्रमुख तुकाराम मुंडे यांच्याकडे कारवाईची मागणी केली होती. त्यानंतर काही व्यक्तींकडून सोशल मीडियावर आपल्याला अपमानास्पद आणि अश्लील मेसेज पाठवण्यात आल्याचा दावा तिने केला आहे. यासंदर्भात तिने इन्स्टाग्राम स्टोरीवर काही स्क्रिनशॅाट शेअर करत थेट मनसे प्रमुख राज ठाकरेंना सवाल केला आहे.

श्वेताने तिच्या इन्स्टाग्राम स्टोरीवर तिला आलेल्या आक्षेपार्ह मेसेजचे स्क्रीनशॉट शेअर केले आहेत. तसेच यामध्ये तिने संबंधित काही सोशल मीडिया अकाउंट्सची प्रोफाइलही शेअर केली आहे. या प्रकारावर श्वेताने तीव्र नाराजी व्यक्त करत महिलांना सोशल मीडियावर अशा प्रकारे अपमानित करण्याच्या मानसिकतेवर प्रश्नचिन्ह उपस्थित केले आहे.

एका पोस्टमधून श्वेताने महिलांशी अश्लील किंवा अपमानास्पद भाषेत बोलणाऱ्या व्यक्तींवर निशाणा साधला. असे लोक केवळ अशिक्षित किंवा गरीब पार्श्वभूमीतील असतात असे नाही, तर अनेक जण सुशिक्षित आणि सधन कुटुंबातील असल्याचे तिने नमूद केले. त्यांच्या घरात पत्नी, आई, मुली आणि बहिणी असूनही ते इतर महिलांशी अशा प्रकारे बोलताना अजिबात संकोच करत नाहीत, याबद्दल तिने आश्चर्य व्यक्त केले.

यानंतर श्वेताने मराठी संस्कृती आणि महिलांच्या सन्मानाचा मुद्दाही उपस्थित केला. महाराष्ट्राशी आपले जुने नाते असल्याचे सांगत तिने आपण संपूर्ण आयुष्य महाराष्ट्रात घालवले असून तिचे वडीलही मुंबईत वाढले असल्याचे म्हटले. मराठी माणूस आणि मराठी संस्कृतीबद्दल आपल्याला कायम अभिमान असल्याचेही तिने स्पष्ट केले.

थेट राज ठाकरेंना सवाल 

दरम्यान, आपल्याला आक्षेपार्ह मेसेज पाठवणाऱ्या व्यक्तींपैकी एक जण राज ठाकरे किंवा त्यांच्या पक्षाचा समर्थक असल्याचा दावा तिने केला आहे. तिने राज ठाकरे यांना पोस्ट टॅग करत थेट सवाल केला की, जर संबंधित व्यक्ती त्यांचा समर्थक असल्याचे सांगत असेल, तर महिलांशी अशा प्रकारे वागणे त्यांना मान्य आहे का?

….तर तिचा अपमान करण्याचा अधिकार कुणालाही मिळत नाही.

श्वेताने म्हटले की, केवळ मराठी बोलणे, स्वतःला मराठी म्हणवून घेणे किंवा महाराष्ट्रावर प्रेम असल्याचे सांगणे पुरेसे नाही. एखाद्या महिलेचे विचार पटत नसतील किंवा तिच्या एखाद्या कृतीशी असहमती असेल, तरी तिचा अपमान करण्याचा अधिकार कुणालाही मिळत नाही. महिलांचा आदर केवळ आपल्या कुटुंबातील महिलांपुरता मर्यादित न ठेवता प्रत्येक महिलेचा केला पाहिजे, असे मत तिने व्यक्त केले.

कारवाई होणार?

आता श्वेताने केलेल्या या दाव्यावर मनसे प्रमुख राज ठाकरे किंवा त्यांच्या पक्षाकडून कोणती प्रतिक्रिया येते का, याकडे लक्ष लागले आहे. तसेच अभिनेत्रीने शेअर केलेल्या आक्षेपार्ह मेसेज प्रकरणी कोणती कारवाई केली जाते, हेही पाहणे महत्त्वाचे ठरणार आहे.

‘द ट्रेटर्स’च्या दुसऱ्या सीझनमध्ये सहभागी

दरम्यान, कामाच्या आघाडीवर बोलायचे झाल्यास श्वेता तिवारी सध्या ॲमेझॉन प्राइम व्हिडिओवरील लोकप्रिय रिअॅलिटी शो ‘द ट्रेटर्स’च्या दुसऱ्या सीझनमध्ये सहभागी झाली आहे. शोमधील तिची रणनीती आणि स्पष्टवक्तेपणामुळे ती चर्चेत आहे. या शोचे सूत्रसंचालन करण जोहर करत आहे.

Mumbai Kurla Accident : मुंबईतील कुर्ल्यात क्रेनचा अपघात; 8 ते 10 जण जखमी झाल्याची शक्यता