नेवासे : अहिल्यानगर जिल्हा मध्यवर्ती सहकारी बँकेच्या निवडणुकीच्या निमित्ताने एकमेकांचे कट्टर राजकीय विरोधक जर सत्तेसाठी एकत्र येत असतील, तर ज्या सर्वसामान्य जनता आणि शेतकऱ्यांच्या मतांवर आपण निवडून आलो, त्या बळीराजाच्या ऊस दरवाढीसाठी त्यांना जाहीर पाठिंबा का देऊ नये? आणि हाच टायमिंग शॉट साधत नेवासे तालुक्याचे आमदार विठ्ठलराव लंघे-पाटील यांनी शेतकरी संघटनेच्या नेवासे फाटा येथील रस्ता रोको आंदोलनात थेट सहभागी होत राजकीय आखाड्यात आपले राजकीय कौशल्य दाखवून दिलेले असल्यामुळे आमदारांच्या या करारी बाण्याच्या भूमिकेचे सर्वत्र स्वागत होत आहे.

सहमती एक्स्प्रेस आणि राजकीय डावपेच!

जिल्हा बँक निवडणूक बिनविरोध करण्यासाठी पालकमंत्री ना.राधाकृष्ण विखे पाटील आणि त्यांचे सुपुत्र भाजपाचे युवा नेते डॉ.सुजय विखे पाटील यांनी सत्ताधाऱ्यांबरोबरच विरोधकांशीही हातमिळवणी करत ‘सहमती एक्स्प्रेस’चा नारा दिला. सत्तेचे समीकरण जुळविण्यासाठी सर्वांनी एकत्र येण्याचा हा प्रयोग यशस्वी झाला आगामी निवडणुकांच्या पार्श्वभूमीवर हे सत्तेचे डावपेच हेरूनच आमदार लंघे-पाटील यांनीही आपला धूर्त राजकारणी पणा सिद्ध करत शेतकऱ्यांच्या या आंदोलनाला पाठिंबा देत आपला राजकीय परिपक्वपणा सिद्ध केलेला आहे अशी जोरदार चर्चा आता नेवासे तालुक्याच्या राजकीय आखाड्यात जोरदारपणे सुरू झालेली आहे.

रस्त्यावर मांडी घालून बसले आमदार

नेवासे फाटा येथील राजमुद्रा चौकातील शेतकऱ्यांच्या रस्ता रोको आंदोलनात आमदार विठ्ठलराव लंघे-पाटील हे देण्यासाठी आलेले असताना सुद्धा ते थेट रस्त्यावर शेतकऱ्यांसोबत मांडी घालून बसलेले होते. “मी इथे आमदार म्हणून नाही, तर शेतकरी पुत्र म्हणून आलोय. शेतकऱ्यांच्या या रास्त मागणीला माझा जाहीर पाठिंबा आहे,” असे त्यांनी स्पष्टपणे सांगितले. त्यांच्या या भूमिकेने उपस्थित शेतकऱ्यांमध्ये उत्साह संचारलेला असून आंदोलनाला केवळ संघटनेचे नव्हे, तर लोकप्रतिनिधीचेही बळ मिळालेले असल्यामुळे या आंदोलनाला एक वेगळीच धार आलेली आहे.

“हम भी कुछ कम नहीं”

सत्ताधारी आणि विरोधक जर जिल्हा बँक निवडणुकीसाठी एकत्र येत असतील, तर आपणही शेतकऱ्यांच्या प्रश्नावर मागे का राहायचे? हाच विचार करून आमदार विठ्ठलराव लंघे-पाटील यांनी “हम भी कुछ कम नहीं” हे दाखवून दिले आहे. एकीकडे जिल्हा बँकेत सहमती, तर दुसरीकडे रस्त्यावर शेतकऱ्यांसाठी लढाई या दोन्ही गोष्टी एकाच वेळी घडत असतांना आमदारांनी शेतकऱ्यांची बाजू घेणे हा निव्वळ योगायोग नाही, तर विचारपूर्वक टाकलेले राजकीय पाऊल आहे, असे राजकीय जाणकारांतून बोलले जात आहे.

शेतकऱ्यांचा सवाल आणि आमदारांची भूमिका

या आंदोलनाचा मूळ प्रश्न ऊसाला साडेचार हजार रुपये भाव, वजन काट्यात पारदर्शकता आणि पंचगंगा पॅटर्नची अंमलबजावणी हा आहे हा प्रश्न केवळ भावाचा नाही, तर विश्वासाचा आहे.आमदारांनी या प्रश्नाला पाठिंबा दिल्याने साखर सम्राटांवर आता दबाव वाढलेला असल्याचे दिसून येत आहे. त्यामुळे आता हिच खरी कसोटी आहे की, हा पाठिंबा केवळ रस्ता रोको पुरताच मर्यादित न राहता विधानसभेत आणि जिल्हाधिकाऱ्यांसमोरील बैठकीतही शेतकऱ्यांच्या बाजूने ठामपणे आमदार विठ्ठलराव लंघे – पाटील यांनी उभे राहून बळीराजाच्या न्याय मागणी आंदोलनाला आता वेगळी धार मिळणार असल्यामुळे संपूर्ण तालुक्यात आमदार लंघे – पाटील यांच्या कणखर भूमिकेचे सर्वत्र स्वागत होताना दिसून येत आहे.

राजकारण की बांधिलकी?

आमदारांचा पाठिंबा हा राजकीय टायमिंग आहे की शेतकरी पुत्र म्हणून खरी बांधिलकी आहे या दोन भिन्न बाबी असल्या तरी बँकेसाठी एकत्र येणारे नेते जर बळीराजासाठीही एकत्र आले, तर शेतकऱ्याचा लढा अधिक मजबूत होईल,अशी नेवासे तालुक्यातील जनतेची जनभावना निर्माण झाली आहे. आमदार लंघे – पाटील यांच्या उपस्थितीने शेतकऱ्यांना मोठा आधार मिळालेला असताना साखर सम्राटांच्या लंघे यांच्या हजेरीने भुवया उंचवलेल्या आहेत.