ICC Champions Trophy, 2025 | आयसीसी चॅम्पियन्स ट्रॉफी 2025 स्पर्धेतील गट फेरीतील शेवटचा सामना आज पार पडणार आहे. गट फेरीतील शेवटच्या सामन्यात भारत आणि न्यूझीलंड संघ एकमेकांना भिडणार आहेत. या सामन्याच्या निकालावर भारताचा उपांत्य फेरीतील सामना कोणत्या संघाशी असेल हे ठरणार आहे.

सध्या, भारत, न्यूझीलंड, ऑस्ट्रेलिया आणि दक्षिण आफ्रिका या संघांनी उपांत्य फेरीतील स्थान निश्चित केले आहे. 2023 वनडे वर्ल्ड कपच्या सेमीफायनल्समध्येही हे चार संघच पोहोचले होते. या 4 संघांपैकी नक्की कोण-कोणाशी भिडणार हे आजच्या सामन्यातील निकालावर ठरेल.

… तर भारत-ऑस्ट्रेलिया उपांत्य फेरीत येणार आमनेसामने

सध्या गट ब मध्ये दक्षिण आफ्रिका 5 अंकांसह पॉइंट टेबलवर पहिल्या स्थानी आहे, तर ऑस्ट्रेलिया 4 अंकांसह पॉइंट टेबलवर दुसऱ्या स्थानी आहे. तर गट अ मध्ये भारतीय संघ 4 अंक आणि +0.647 नेट रन रेटसह दुसऱ्या स्थानी आहे. न्यूझीलंड 4 अंक आणि 0.863 नेट रन रेटसह पॉइंट टेबलमध्ये पहिल्या स्थानी आहे

आजच्या सामन्यात भारत विजयी झाल्यास गट अ मध्ये पहिल्या स्थानावर पोहोचेल व उपांत्य फेरीत त्यांचा सामना गट ब मध्ये दुसऱ्या स्थानावर असलेल्या ऑस्ट्रेलियाशी होईल. तर न्यूझीलंडचा सामना गट ब मध्ये पहिल्या स्थानावर असलेल्या दक्षिण आफ्रिकेशी होईल.

… तर फायनलमध्ये भारत-ऑस्ट्रेलिया सामना रंगणार

समजा, आजच्या न्यूझीलंडविरुद्धच्या सामन्यात भारताचा पराभव झाला अथवा सामना अनिर्णित राहिल्यास, भारत गट अ मध्ये दुसऱ्या स्थानावर राहिल. अशा स्थितीमध्ये उपांत्य फेरीत त्यांचा सामना गट ब मध्ये पहिल्या स्थानावर असलेल्या दक्षिण आफ्रिकेशी होईल. तर दुसऱ्या उपांत्य फेरीत न्यूझीलंड-ऑस्ट्रेलिया यांच्यात सामना पार पडेल.

या दोन्ही उपांत्य फेरीतील सामन्यांमध्ये अनुक्रमे भारत आणि ऑस्ट्रेलियाचा विजय झाल्या, हे दोन्ही चॅम्पियन्स ट्रॉफीच्या अंतिम सामन्यात एकमेकांविरुद्ध खेळताना पाहायला मिळू शकतात. असे झाल्यास 2023 च्या वनडे वर्ल्ड कपची पुनरावृत्ती पाहायला मिळू शकते. तसेच, 2023 वर्ल्ड कपच्या अंतिम सामन्यातील पराभवाचा वचपा काढण्याचीही संधी भारतीय संघाकडे असेल.