नवी दिल्ली :- पाकिस्तानच्या सीमेला लागून असलेल्या केंद्रशासित प्रदेशातील खोऱ्यांमध्ये उड्डाणाचा अनुभव घेण्यासाठी भारतीय हवाई दलाने एक पाऊल उचलले आहे. त्यांनी आपले स्वदेशी हलके लढाऊ विमान “तेजस’ जम्मू-काश्‍मीरला पाठवले आहे.

खोऱ्यांमधील उड्डाण आणि इतर ऑपरेशन्सचा अनुभव घेण्यासाठी भारतीय वायूसेनेने आपले स्वदेशी बनावटीचे हलके लढाऊ विमान घेण्याचा निर्णय घेतला आहे. ताफ्यातील वैमानिक खोऱ्यात उड्डाण करून अनुभव घेत असल्याचे संरक्षण अधिकाऱ्यांचे म्हणणे आहे. भारतीय हवाई दलाचे केंद्रशासित प्रदेशात अनेक तळ आहेत, जे चीन आणि पाकिस्तानसह दोन्ही आघाड्यांवर ऑपरेशनसाठी महत्त्वाचे आहेत.

ताफ्यातील विमाने कुठेतरी नेण्याची ही पहिलीच वेळ नाही. भारतीय हवाई दल वारंवार त्यांची विमाने जम्मू आणि काश्‍मीर आणि लडाखसह उत्तरेकडील दोन केंद्रशासित प्रदेशांना वेगवेगळ्या भूभागात उड्डाण करण्याचा अनुभव देण्यासाठी पाठवते.

विमानात अधिकाधिक क्षमता जोडून भारतीय हवाई दल या मोहिमेला जोरदार पाठिंबा देत आहे. त्यात स्वदेशी तेजस या लढाऊ विमानाचाही समावेश आहे. संरक्षण संशोधन आणि विकास संस्थेद्वारे विकसित केल्या जाणाऱ्या एलसीए मार्क-2 आणि एएमसीएवरही दलाची नजर आहे. त्याच वेळी, भारतीय विमाने आधीपासूनच पाकिस्तानी आणि चीनच्या संयुक्त उपक्रम जेएफ-17 लढाऊ विमानापेक्षा कितीतरी अधिक सक्षम असल्याचे मानले जाते.

हे एकल-इंजिन असलेले 6,500 किलो वजनाचे हलके लढाऊ विमान असून त्यातील 50 टक्के भाग भारतात बनवले जातात. यामध्ये इस्रायलचे रडार बसवण्यात आले आहे. हे एकाच वेळी 10 लक्ष्यांना ट्रॅक आणि त्यावर हल्ला करू शकते. अगदी लहान धावपट्टीवर ते उतरवता येते.

यामध्ये 6 प्रकारची क्षेपणास्त्रे, लेझर गाईडेड बॉम्ब आणि क्‍लस्टर शस्त्रे बसवता येतात. हे सेल्फ प्रोटेक्‍शन जॅमरने सुसज्ज आहे, जे हल्ल्याच्या वेळी जेटला वाचवण्यास मदत करते. ते एकावेळी 3000 किलोमीटरपर्यंत उड्डाण करू शकते. त्याची प्रगत आवृत्ती “तेजस मार्क-2′ आहे, जी 56 हजार फुटांपेक्षा जास्त उंचीपर्यंत उडू शकते. रशियन फायटर मिग-21 पेक्षा हा एक चांगला पर्याय मानला जातो.