Tejashree Pradhan: अभिनेत्री तेजश्री प्रधान मराठी मनोरंजनसृष्टीतील लोकप्रिय नाव आहे. अनेक मालिका आणि सिनेमांमधून तिने आपल्या अभिनयाची छाप प्रेक्षकांच्या मनावर उमटवली आहे. त्यामुळे तेजश्रीच्या अभिनयासोबतच तिच्या वैयक्तिक आयुष्याबद्दलही चाहत्यांना कायम उत्सुकता असते. गेल्या काही दिवसांपासून तेजश्री पुन्हा एकदा तिच्या खासगी आयुष्यामुळे चर्चेत आली आहे. याचं कारण म्हणजे अभिनेत्रीने दुसऱ्यांदा प्रेमात पडण्याबद्दल आणि लग्नाबद्दल केलेलं वक्तव्य.

तेजश्री प्रधानने अभिनेता शशांक केतकरसोबत लग्न केलं होतं. दोघांची जोडी त्यावेळी चाहत्यांमध्येही लोकप्रिय होती. मात्र, त्यांचं लग्न फार काळ टिकलं नाही. काही काळानंतर दोघांनी विभक्त होण्याचा निर्णय घेतला आणि त्यांचा घटस्फोट झाला. या घटनेनंतर तेजश्रीने आपल्या कामावर लक्ष केंद्रित केलं आणि ती मनोरंजन क्षेत्रात सक्रिय राहिली. आता एका मुलाखतीमध्ये तेजश्रीला पुन्हा प्रेमात पडणार का, असा प्रश्न विचारण्यात आला. या प्रश्नाचं उत्तर देताना अभिनेत्रीने प्रेम आणि लग्नाबाबत तिचं मत मोकळेपणाने व्यक्त केलं.

‘मला प्रेमात पडायला आवडेल…’

दुसऱ्यांदा प्रेमात पडणार का, असं विचारल्यानंतर तेजश्रीने होकार देत उत्तर दिलं. ती म्हणाली, ‘मला तर प्रेमात पडायला आवडेल. माझं लग्न व्हावं, हे तर माझ्या जवळच्या मित्रमंडळींचं स्वप्न आहे…’ तेजश्रीच्या या वक्तव्यामुळे तिच्या चाहत्यांमध्ये पुन्हा चर्चांना सुरुवात झाली आहे. अभिनेत्रीला भविष्यात पुन्हा लग्न करायचं आहे का, तिच्या आयुष्यात कोणी खास व्यक्ती आहे का, असे प्रश्नही चाहत्यांकडून उपस्थित केले जात आहेत. मात्र, तेजश्रीने सध्या तिच्या आयुष्यात कोणती व्यक्ती आहे किंवा ती कोणासोबत रिलेशनशिपमध्ये आहे, याबाबत कोणतीही माहिती दिलेली नाही.

तेजश्रीने सांगितली प्रेमाची व्याख्या

याच मुलाखतीत तेजश्रीला तिच्यासाठी प्रेम म्हणजे नेमकं काय, असा प्रश्नही विचारण्यात आला. यावर तिने अतिशय साध्या आणि भावनिक शब्दांत प्रेमाची व्याख्या सांगितली. तेजश्री म्हणाली, ‘काम संपवून आपल्याला घरी जाण्याचं मोटिव्ह मिळालं पाहिजे, इतका जवळचा आपला माणूस…’ तेजश्रीच्या या उत्तरातून तिच्यासाठी प्रेम म्हणजे फक्त नातं किंवा आकर्षण नसून, आपल्या आयुष्यातील एखादी अशी व्यक्ती असणं आहे, जिच्याजवळ परत जाण्याची आपल्याला इच्छा वाटते. तिच्या या विचाराची सोशल मीडियावरही चर्चा होत आहे.

खासगी आयुष्यापेक्षा कामालाही दिलं महत्त्व

घटस्फोटानंतर तेजश्रीने स्वतःला केवळ आपल्या वैयक्तिक आयुष्यापुरतं मर्यादित ठेवलं नाही. अभिनयाच्या क्षेत्रात ती सातत्याने काम करत राहिली. मालिका, सिनेमा आणि इतर माध्यमांमधून तिने प्रेक्षकांचं मनोरंजन केलं आहे.

तेजश्री सोशल मीडियावरही सक्रिय असते. तिचे अनेक फोटो आणि व्हिडीओ सोशल मीडियावर व्हायरल होत असतात. आपल्या आयुष्यात आलेले अनुभव आणि त्यातून शिकलेल्या गोष्टींबद्दलही ती अनेकदा मोकळेपणाने बोलताना दिसते.

दरम्यान, तेजश्रीच्या दुसऱ्या लग्नाबाबतच्या वक्तव्यामुळे तिच्या चाहत्यांची उत्सुकता वाढली आहे. मात्र, अभिनेत्रीने भविष्यात लग्न कधी करणार किंवा तिच्या आयुष्यात सध्या कोणीतरी खास व्यक्ती आहे का, याबाबत कोणतीही अधिकृत माहिती दिलेली नाही. त्यामुळे सध्या तिच्या वक्तव्याचीच सोशल मीडियावर चर्चा सुरू आहे.