Rhea Chakraborty : ‘माझ्याकडे संशयाच्या नजरेने पाहिले गेले’; सुशांत सिंह राजपूत प्रकरणात रियाने सांगितली वेदनादायी काळाची आठवण
Rhea Chakraborty : सुशांत सिंह राजपूत मृत्यू प्रकरणात तिच्यावर गंभीर आरोप करण्यात आले. चहूबाजूंनी टीका करण्यात आली. अनेक वर्षे तिला या सगळ्याचा सामना करावा लागला.
Rhea Chakraborty : अभिनेता सुशांत सिंह राजपूत मृत्यू प्रकरणात केंद्रीय अन्वेषण ब्युरोने (CBI) क्लोजर रिपोर्ट सादर केला आहे. यामुळे या प्रकरणात अभिनेत्री आणि सुशांतची एक्स गर्लफ्रेंड रिया चक्रवर्तीला मोठा दिलासा मिळाला. यानंतर अभिनेत्रीने एका रिअॅलिटी शोमध्ये याबाबत मोठा खुलासा केला आहे.
सुशांत सिंह राजपूत मृत्यू प्रकरणात तिच्यावर गंभीर आरोप करण्यात आले. चहूबाजूंनी टीका करण्यात आली. अनेक वर्षे तिला या सगळ्याचा सामना करावा लागला. संशयाच्या भोवऱ्यात अडकलेल्या रियाने आता स्वतःला ‘निर्दोष’ म्हणून ओळखले जाणे पसंत असल्याचे सांगितले.
करण जोहर होस्ट करत असलेला ‘द ट्रेटर्स’ सीझन २ हा रिअॅलिटी शो चर्चेत असून, या शोच्या दुसऱ्या पर्वात सहभागी झालेल्या रियाला शोचा होस्ट करण जोहरने एक प्रश्न विचारला. “तुला ‘इनोसंट’ (निर्दोष) राहायला आवडेल की ‘ट्रेटर’ (देशद्रोही)?” यावर रियाने कोणतीही शंका न ठेवता उत्तर दिले, “मला निर्दोष राहायचे आहे. यावर्षी मला निर्दोष ठरवण्यात आले आणि लोकांनाही समजले की मी निरपराध आहे. अनेक वर्षे माझ्याकडे संशयाच्या नजरेने पाहिले गेले. त्यामुळे आता मला त्यापासून दूर राहायचे आहे.”
अटक अन् क्लीन चीन
२०२० मध्ये अभिनेता सुशांत सिंह राजपूतच्या मृत्यूनंतर रिया चक्रवर्ती प्रचंड चर्चेत आली होती. या प्रकरणात तिची विविध केंद्रीय यंत्रणांकडून चौकशी करण्यात आली. नार्कोटिक्स कंट्रोल ब्युरोने (NCB) सुशांतशी संबंधित कथित ड्रग्ज प्रकरणात रिया आणि तिचा भाऊ शोविक चक्रवर्ती यांना अटकही केली होती. त्यानंतर काही काळ तिला तुरुंगवास भोगावा लागला. दरम्यान, सीबीआयने आपल्या अंतिम अहवालात रियाविरोधातील आरोपांना कोणताही ठोस आधार नसल्याचे नमूद करत तिला क्लीन चिट दिली.
या संपूर्ण प्रकरणाचा आपल्या मानसिक आरोग्यावर गंभीर परिणाम झाल्याचे रियाने यापूर्वीही सांगितले होते. एका मुलाखतीत तिने खुलासा केला होता की, त्या काळातील घटनांमुळे तिला पोस्ट-ट्रॉमॅटिक स्ट्रेस डिसऑर्डर (PTSD)चा सामना करावा लागला.
‘द ट्रेटर्स’ शोचा दुसरा सीझन
सध्या रिया ‘द ट्रेटर्स’च्या दुसऱ्या सीझनमध्ये झळकत आहे. संशय, रणनीती आणि फसवणुकीवर आधारित असलेल्या या शोमध्ये स्पर्धकांना ‘इनोसंट्स’ आणि ‘ट्रेटर्स’ अशा दोन गटांत विभागले जाते. ‘इनोसंट्स’ना लपलेल्या ‘ट्रेटर्स’चा शोध घेऊन त्यांना स्पर्धेतून बाहेर काढायचे असते, तर ‘ट्रेटर्स’ स्वतःची ओळख गुप्त ठेवत खेळ पुढे नेतात. या दुसऱ्या पर्वात रियासोबत अभिषेक मल्हान, मुनवर फारुकी, मल्लिका शेरावत, क्रिस्टल डिसूझा, रणवीर ब्रार, दलीप ताहिल, पारुल गुलाटी, आदित्य कुलश्रेष्ठ (कुल्लू), अंश चोप्रा, हरमन सिंगा, इक्का सिंग, करण सिंग मॅजिक, प्रिशा यांसह अनेक प्रसिद्ध चेहरे सहभागी झाले आहेत.
