Ravi Jadhav :  आज सर्वत्र गणेश चतुर्थीचा उत्साह पाहायला मिळत आहे. गणपती बाप्पाच्या आगमनासाठी सर्वसामान्यांपासून ते मनोरंजन विश्वातील कलाकारांपर्यंत अनेकजण गेल्या काही दिवसांपासून जय्यत तयारी करत आहेत. सोशल मीडियावरही कलाकारांकडून गणपतीच्या सजावटीचे फोटो आणि व्हिडीओ शेअर केले जात आहेत. अशातच मराठी चित्रपटसृष्टीतील प्रसिद्ध दिग्दर्शक रवी जाधव यांनी बाप्पासाठी केलेली खास तयारी चाहत्यांचे लक्ष वेधून घेत आहे.

रवी जाधव यांनी त्यांच्या अधिकृत इन्स्टाग्राम अकाउंटवर काही खास फोटो शेअर केले आहेत. या फोटोंमध्ये ते स्वतः गणपती बाप्पाची मूर्ती साकारताना दिसत आहेत. विशेष म्हणजे, गेल्या तब्बल २० वर्षांपासून रवी जाधव स्वतःच्या हाताने गणेशमूर्ती तयार करत आहेत.

ही पोस्ट शेअर करताना रवी जाधव यांनी बाप्पासोबतचं आपलं खास नातं शब्दांत व्यक्त केलं आहे. “२० वर्षं, माझा बाप्पा माझ्या हातून घडतोय आणि बाप्पाच्या हातून मी घडतोय,” असं त्यांनी पोस्टमध्ये म्हटलं आहे.

 

View this post on Instagram

 

A post shared by Ravi Jadhav (@ravijadhavofficial)

रवी जाधव यांनी शेअर केलेल्या तीन फोटोंमध्ये त्यांच्या गणपती बाप्पाप्रती असलेली श्रद्धा आणि कलात्मकता पाहायला मिळते. पहिल्या ब्लॅक अँड व्हाईट फोटोमध्ये त्यांच्या समोर श्री गणेशाची छोटी मूर्ती दिसत असून त्यांच्या हातात ब्रश आहे. तर दुसऱ्या आणि तिसऱ्या फोटोमध्ये गणेशमूर्तीला रंग देतानाचा टप्पा पाहायला मिळतो. त्यांनी साकारलेली बाप्पाची मूर्ती अतिशय सुंदर आणि आकर्षक दिसत आहे.

रवी जाधव यांच्या या पोस्टवर चाहत्यांनीही भरभरून प्रतिक्रिया दिल्या आहेत. “सुंदर, खूप खूप छान… गणपती बाप्पा मोरया” अशी कमेंट एका नेटकऱ्याने केली. तर आणखी एका चाहत्याने, “खूप सुंदर सर, किती छोटू बाप्पा वाटतोय. बाप्पाचा आशीर्वाद सदैव राहो तुमच्या पाठीशी” असं लिहिलं आहे.

दरवर्षी गणेशोत्सव मोठ्या उत्साहात आणि भक्तिभावाने साजरा केला जातो. सामान्यांप्रमाणेच अनेक सेलिब्रिटींच्या घरीही बाप्पाचं आगमन होतं. यासाठी कलाकार आपल्या घराची खास सजावट करतात आणि बाप्पाच्या स्वागताची तयारी करतात. त्यामुळे यंदा आपल्या आवडत्या कलाकारांच्या घरातील गणपती बाप्पाचं दर्शन घेण्यासाठी चाहतेही उत्सुक आहेत.

Women Asia Cup : आशिया कप जिंकला, पण ट्रॉफी स्विकारण्यास नकार; दुबईतील VIDEO व्हायरल, नेमकं काय घडलं?