HPV Vaccination Campaign : देशव्यापी एचपीव्ही लसीकरण मोहिमेचा (HPV Vaccination Campaign) पंतप्रधान नरेंद्र मोदी यांच्या हस्ते शनिवारी शुभारंभ करण्यात आला आहे. अजमेर येथून एचपीव्ही लसीकरण मोहीम सुरू झाली आहे, ही मोहीम देशाच्या नारी शक्तीला सक्षम बनवण्याच्या दिशेने एक महत्त्वपूर्ण पाऊल आहे. भारताच्या नारी शक्तीला सबळ करण्यासाठी आणि माता व मुलींना कॅन्सरमुक्त आरोग्याच्या संरक्षणासाठी हा अत्यंत महत्त्वाचा टप्पा मानला जात आहे. या कार्यक्रमात केंद्रीय आरोग्य मंत्री जगत प्रकाश नड्डा यांनी कर्तव्य भवन येथून दूरदृश्य प्रणालीमार्फत सहभाग घेतला. यानंतर सर्व राज्ये व केंद्रशासित प्रदेशांमध्ये स्थानिक कार्यक्रमांद्वारे एचपीव्ही लसीकरण मोहिमेची सुरुवात करण्यात आली. हा उपक्रम गर्भाशय मुखाच्या कर्करोगाविरुद्धच्या भारताच्या लढाईतील एक ऐतिहासिक टप्पा आहे. नरेंद्र मोदी म्हणाले, आपल्या सर्वांना माहित आहे की जेव्हा कुटुंबात आई आजारी पडते तेव्हा संपूर्ण घर विस्कळीत होते. जर आई निरोगी असेल तर कुटुंब कोणत्याही संकटाचा सामना करण्यास सक्षम राहते. या भावनेतून सरकारने महिलांना आधार देण्यासाठी अनेक योजना राबवल्या आहेत. महिलांच्या आरोग्य आणि प्रतिष्ठेबाबतच्या सरकारच्या संवेदनशील आणि ध्येयवादी दृष्टिकोनावर भर देत, पंतप्रधानांनी स्वच्छता उपक्रमांतर्गत मोठ्या प्रमाणात शौचालय बांधकाम, परवडणाऱ्या दरात सॅनिटरी पॅडची उपलब्धता आणि लाखो कुटुंबांसाठी स्वच्छ स्वयंपाक इंधन सुनिश्चित करणाऱ्या प्रधानमंत्री उज्ज्वला योजना यासारख्या परिवर्तनकारी उपाययोजनांचा उल्लेख केला. पंतप्रधानांनी सुरक्षित मातृत्व योजनेचा उल्लेख केला, ज्या अंतर्गत गर्भधारणेदरम्यान पौष्टिक अन्नासाठी 5,000 रुपये थेट गर्भवती मातांच्या बँक खात्यात जमा केले जातात. या उपक्रमांमुळे महिलांच्या आरोग्य आणि कल्याणाबाबतच्या दुर्लक्षाऐवजी काळजी, सन्मान आणि संवेदनशीलतेवर आधारित दृष्टिकोन निर्माण झाल्याचे पंतप्रधानांनी अधोरेखित केले.
