Mahesh Gaikwad – उल्हासनगरमध्ये भाजप आमदार गणपत गायकवाड यांच्याकडून शिंदे गटाचे कल्याण शहर प्रमुख महेश गायकवाड यांच्यावर अंदाधुंद गोळीबार करण्यात आल्याची घटना घडली.यामध्ये महेश गायकवाड यांना सहा गोळ्या लागल्या तर राहुल पाटील यांना दोन गोळ्या लागल्या. या हल्ल्यानंतर दोन्हही जखमींना ज्युपिटर हॉस्पिटलमध्ये दाखल करण्यात आले आहे. हॉस्पिटलच्या डॉक्टरांनी जखमींच्या प्रकृतीबाबत अपडेट दिली आहे. या घटनेत सत्ताधारी भाजप आणि शिंदे गटातील पदाधिकारी असल्यामुळे याची जोरदार चर्चा सुरु आहे.विरोधकांनी देखील यावरून सरकारला घेरण्यासाठी कायदा सुव्यवस्थेबाबत प्रश्न उपस्थित करायला सुरुवात केली आहे. अशात मुख्यमंत्री शिंदेंसह खासदार श्रीकांत शिंदे यांनी देखील जखमींची भेट घेऊन विचारपूस केली आहे. महेश गायकवाड यांच्या शरीरातून सहा गोळ्या बाहेर काढल्या आहेत. महेश गायकवाड यांच्या प्रकृतीला असलेला धोका टळलेला नाही. त्यांची प्रकृती चिंताजनक आहे. त्यांना व्हेंटिलेटरवर ठेवण्यात आलय, अशी माहिती ज्युपिटर हॉस्पिटलच्या डॉक्टरांनी दिली आहे. काय म्हणाले गोळ्या झाडणारे भाजप आमदार गोळीबारानंतर गणपत गायकवाड यांनी माध्यमांशी बोलतांना या संपूर्ण प्रकरणावर आपली पहिली प्रतिक्रिया दिली ते म्हणाले,”मी 10 वर्षापूर्वी एक जागा घेतली होती. शिंदे गटाच्या महेश गायकवाड यांनी जबरदस्ती या जागेवर ताबा मिळवण्याचा प्रयत्न केला. महेश गायकवाड कम्पाऊंड तोडून जागेचा ताबा घेण्याचा प्रयत्न करत होता. काल संध्याकाळी 400 ते 500 जण घेऊन महेश गायकवाड पोलीस स्टेशनमध्ये आले. माझा मुलगा पोलीस स्टेशनमधून बाहेर जात असताना त्यांनी धक्काबुक्की केली. या सर्व गोष्टीचा मनस्ताप झाला म्हणून मी गोळीबार केला. मला या कृत्याचा पश्चाताप नाही. माझ्यासमोर ते माझ्या मुलाला हात लावत असतील, तर माझा जगून काय फायदा? त्यामुळे काल रात्री मी आत्मसंरक्षणासाठी गोळीबार केला.”
