Housing prices rise : आर्थिक अनिश्चिततेमुळे मागणी कमी झाल्याने आणि घरांच्या वाढत्या किमतींमुळे, सात प्रमुख शहरांमध्ये एप्रिल-जूनमध्ये घरांची विक्री 6 टक्क्यांनी घसरून 90,715 युनिट्सवर आली आहे, असे अनारॉकने प्रसिद्ध म्हटले आहे.

मागील वर्षी याच कालावधीत मुंबई महानगर प्रदेश (एमएमआर), दिल्ली-एनसीआर, पुणे, बंगळूर, हैदराबाद, चेन्नई आणि कोलकाता या सात प्रमुख शहरांमध्ये मिळून 96,285 युनिट्सची विक्री झाली होती.

या कॅलेंडर वर्षाच्या दुसर्‍या तिमाहीत या सात शहरांमध्ये घरांच्या सरासरी किमती वार्षिक 7 टक्क्यांनी वाढल्या. शहरांमध्ये, दिल्ली-एनसीआरच्या बाजारपेठेत एप्रिल-जून दरम्यान वार्षिक 13 टक्क्यांची सर्वाधिक भाववाढ दिसून आली.

विशेष म्हणजे, रिअल इस्टेट सल्लागार अनारॉकची एप्रिल-जून तिमाहीची विक्री आकडेवारी ही सूचीबद्ध कंपनी प्रॉपइक्विटीच्या ताज्या अहवालाच्या पूर्णपणे विरुद्ध आहे, ज्यामध्ये चालू तिमाहीत निवासी मालमत्तांच्या विक्रीत 19 टक्के वाढ होऊन 1,12,458 युनिट्सची विक्री झाल्याचे नमूद केले आहे.

अनारॉकचे अध्यक्ष अनुज पुरी म्हणाले, मध्य-पूर्वेतील युद्धामुळे निर्माण झालेला व्यत्यय आणि आयटी/आयटीईएस क्षेत्रातील एआय-संबंधित अनिश्चिततेमुळे खरेदीदार द्विधा मनःस्थितीत आले आहेत. घरांच्या मागणीतील वाढ आता प्रीमियम घरे, जीसीसी-प्रणित रोजगार केंद्रे आणि पायाभूत सुविधांवर आधारित कॉरिडॉरमध्ये केंद्रित झाली आहे.

अनारॉकच्या आकडेवारीनुसार, दिल्ली-एनसीआरमध्ये एप्रिल-जून दरम्यान घरांची विक्री मागील वर्षीच्या याच कालावधीतील 14,255 युनिट्सवरून 6 टक्क्यांनी घसरून 13,365 युनिट्सवर आली.

एमएमआरमध्ये, याच कालावधीत विक्री 8 टक्क्यांनी घसरून 31,275 युनिट्सवरून 28,710 युनिट्सवर आली. पुण्यात घरांची विक्री 15 टक्क्यांनी घसरून 15,410 युनिट्सवरून 13,090 युनिट्सवर आली. चेन्नईमध्ये विक्रीत 9 टक्क्यांची घट होऊन ती 5,660 युनिट्सवरून 5,135 युनिट्सवर आली.
तथापि, उर्वरित तीन शहरांमध्ये विक्रीत वाढ झाली.

बंगळूरूमध्ये विक्री 1 टक्क्याने वाढून 15,120 युनिट्सवरून 15,285 युनिट्सवर पोहोचली. हैदराबादमध्येही विक्रीत 2 टक्क्यांची वाढ होऊन ती 11,040 युनिट्सवरून 11,270 युनिट्सवर पोहोचली. शेवटी, कोलकातामध्ये एप्रिल-जून 2026 मध्ये घरांची विक्री मागील वर्षीच्या याच कालावधीतील 3,525 युनिट्सवरून 10 टक्क्यांनी वाढून 3,860 युनिट्सवर पोहोचली.

नवीन गृहनिर्माण प्रकल्प लाँच –
या सात शहरांमध्ये या वर्षी एप्रिल-जून दरम्यान निवासी मालमत्तांचा नवीन पुरवठा किंवा लाँच मागील वर्षीच्या याच कालावधीतील 98,625 युनिट्सवरून 7 टक्क्यांनी वाढून 1,06,000 युनिट्सवर पोहोचला. त्यामुळे आगामी काळाबाबत विकसक आशावादी असल्याचे दिसून येते.