Accident News : पुणे जिल्ह्यातील मुळशी तालुक्यात चांदे-मूलखेड रस्त्यावर भीषण अपघाताची घटना घडली आहे. रिक्षा आणि फॉर्च्युनर गाडीची समोरासमोर धडक झाल्याने हा अपघात झाला.

या दुर्घटनेत रिक्षाचालकाचा जागीच मृत्यू झाला असून फॉर्च्युनरमधील तिघेजण जखमी झाले आहेत. जखमींमध्ये ठाकरे गटाचे पुणे जिल्हाप्रमुख प्रकाश भेगडे यांचाही समावेश आहे. त्यांच्या डोक्याला दुखापत झाल्याची माहिती समोर आली आहे.

मृत रिक्षाचालकाचे नाव विकास अर्जुन पारखी असे आहे. अपघाताची माहिती मिळताच स्थानिकांनी घटनास्थळी धाव घेत बचावकार्य सुरू केले आणि जखमींना तातडीने जवळच्या रुग्णालयात उपचारासाठी दाखल केले.

या प्रकरणी अभिमन्यू अर्जुन पारखी यांनी दिलेल्या फिर्यादीवरून फॉर्च्युनर चालकाविरोधात मुळशीतील पौड पोलीस ठाण्यात गुन्हा दाखल करण्यात आला आहे. पोलिसांकडून घटनेचा पुढील तपास सुरू आहे.

दरम्यान, या भीषण धडकेत रिक्षा आणि फॉर्च्युनर या दोन्ही वाहनांचे मोठ्या प्रमाणात नुकसान झाले आहे. मिळालेल्या माहितीनुसार, मृत रिक्षाचालकाचे नाव विकास अर्जुन पारखी असे असून ते स्थानिक रहिवासी होते.

अपघाताचे नेमके कारण अद्याप स्पष्ट झाले नसून वेग आणि निष्काळजीपणा यामुळे हा अपघात घडल्याची प्राथमिक शक्यता वर्तवण्यात आली आहे. या भीषण अपघातामुळे परिसरात हळहळ व्यक्त केली जात आहे.

हेही वाचा : Mother Daughter Bond: प्रत्येक आईने मुलीला शिकवावी ‘ही’ एक गोष्ट; आयुष्यभर राहील आत्मविश्वास आणि ताकद