Madhuri Misal : होमिओपॅथी डॉक्टरांना काही विशिष्ट ॲलोपॅथिक औषधे लिहून देण्याची परवानगी देण्याबाबतच्या मुद्द्यावर राज्य सरकार अंतिम न्यायालयीन आदेशाच्या प्रतीक्षेत असल्याचे सरकारने सोमवारी स्पष्ट केले. विशेष म्हणजे या संदर्भातील अनिवार्य ब्रिज कोर्स (अभ्यासक्रम) जवळपास ८,००० डॉक्टरांनी पूर्ण केला आहे, अशी माहीती विधानसभेत एका लक्षवेधी सूचनेला उत्तर देताना वैद्यकीय शिक्षण राज्यमंत्री माधुरी मिसाळ यांनी दिली. मिसाळ म्हणाल्या, महाराष्ट्रातील ग्रामीण आणि दुर्गम भागांमध्ये एमबीबीएस डॉक्टरांची असलेली कमतरता लक्षात घेऊनच सर्टिफिकेट कोर्स इन मॉडर्न फार्माकोलॉजी हा अभ्यासक्रम सुरू करण्यात आला होता. यानुसार साडेपाच वर्षांची बीएचएमएस पदवी पूर्ण केलेल्या डॉक्टरांना आवश्यकतेनुसार काही विशिष्ट ॲलोपॅथिक औषधे लिहून देण्याबाबतचे मर्यादित ज्ञान प्राप्त करण्यासाठी अतिरिक्त एक वर्षाचा अभ्यासक्रम पूर्ण करण्याची मुभा देण्यात आली आहे. जवळपास ८,००० डॉक्टरांनी हा अभ्यासक्रम पूर्ण केला असून, ३३ संस्थांमार्फत या संदर्भातील प्रशिक्षण दिले जात आहे. मात्र, काही ॲलोपॅथिक डॉक्टरांनी आणि त्यांच्या संघटनांनी या अभ्यासक्रमाला विरोध केला होता, आणि त्यानंतर हे प्रकरण मुंबई उच्च न्यायालयात पोहोचले होते. उच्च न्यायालयाच्या अंतरिम आदेशाचे पालन करत, सरकारने पात्र होमिओपॅथी डॉक्टरांच्या नोंदणीसाठी एक ऑनलाइन पोर्टल तयार केले आहे. या पोर्टलवर आतापर्यंत सुमारे २,१८२ डॉक्टरांनी नोंदणी केली आहे. तथापि, हे प्रकरण न्यायप्रविष्ट असल्याने आणि न्यायालयाचा अंतिम आदेश अद्याप प्राप्त झालेला नसल्याने या डॉक्टरांना अद्याप कोणतीही प्रमाणपत्रे वितरित करण्यात आलेली नाहीत. ग्रामीण भागातील डॉक्टरांची कमतरता दूर करणे आणि जनतेला मूलभूत आरोग्य सेवा उपलब्ध करून देणे हेच याचे मुख्य उद्दिष्ट असल्याचे मिसाळ यांनी स्पष्ट केले.
