Hockey India Announce : भारतीय हॉकीचं ‘मिशन २०-२६’ सुरू! ३६ शिलेदारांची घोषणा; बंगळुरूमध्ये रंगणार प्रशिक्षणाचा थरार, अनुभवी आणि युवा खेळाडूंचा मेळ

Hockey India Core Probable Group 2026 Announced : आगामी आंतरराष्ट्रीय हॉकी हंगामातील मोठी आव्हाने पेलण्यासाठी हॉकी इंडियाने आपली कंबर कसली असून, वरिष्ठ पुरुष राष्ट्रीय संघाच्या ३६ सदस्यीय कोअर संभाव्य गटाची घोषणा करण्यात आली आहे. मिशन ‘विश्वचषक’ आणि ‘आशियाई क्रीडा’ स्पर्धा डोळ्यांसमोर ठेवून भारतीय संघाच्या रणनीतीला नवी धार दिली जाणार आहे. (Hockey India Announce)

भारतीय हॉकी संघासमोर यावर्षी एफआयएच प्रो लीगचा युरोपियन टप्पा, विश्वचषक आणि आशियाई क्रीडा स्पर्धा यांसारखी महत्त्वाची उद्दिष्टे आहेत. या स्पर्धांसाठी खेळाडूंची तंदुरुस्ती आणि कौशल्य वाढवण्यासाठी बेंगळुरू येथे २० एप्रिल ते ९ मे या कालावधीत विशेष प्रशिक्षण शिबिराचे आयोजन करण्यात आले आहे. या शिबिरासाठी निवडण्यात आलेल्या ३६ सदस्यीय कोअर ग्रुपमध्ये अनुभवाचा दांडगा वारसा आणि युवा टॅलेंट यांचा अचूक समतोल साधण्यात आला आहे. (Hockey India Announce)

बलाढ्य ‘डिफेन्स’ आणि कल्पक ‘मिडफिल्ड’ – (Hockey India Announce) संघाच्या बचाव फळीची (डिफेन्स) जबाबदारी कर्णधार हरमनप्रीत सिंग आणि अमित रोहिदास या अनुभवी जोडीवर असेल. त्यांना जुगराज सिंग, जर्मनप्रीत सिंग आणि सुमित यांसारख्या खेळाडूंची खंबीर साथ लाभणार आहे. मध्यफळीत (मिडफिल्ड) मनप्रीत सिंग, हार्दिक सिंग आणि विवेक सागर प्रसाद हे दिग्गज खेळाडू आक्रमणाची सूत्रे आपल्या हाती घेतील.

आक्रमणाची धार वाढली – फॉरवर्ड लाईनमध्ये मनदीप सिंग, अभिषेक आणि सुखजीत सिंग यांसारख्या अनुभवी गोलशूटरचा समावेश करण्यात आला आहे. विशेष म्हणजे, आदित्य अर्जुन लालागे आणि उत्तम सिंग यांसारख्या वेगवान युवा खेळाडूंना संधी देऊन भारतीय आक्रमणाला अधिक आक्रमक बनवण्याचा प्रयत्न करण्यात आला आहे. गोलरक्षकाच्या भूमिकेत कृष्ण बहादूर पाठक आणि सूरज कारकेरा यांच्या जोडीला प्रिन्सदीप सिंग सारख्या नव्या दमाच्या खेळाडूला स्थान मिळाले आहे. (Hockey India Announce)

हेही वाचा – Akash Madhwal : ‘मुंबईच्या’ हिरोची चेन्नईत एन्ट्री! MI विरुद्धच्या सामन्यापूर्वी CSKचा मास्टर स्ट्रोक; आयुष म्हात्रेच्या जागी दिली संधी

कोअर प्रोबेबल ग्रुप : (Hockey India Announce) गोलरक्षक : कृष्ण बहादूर पाठक, पवन, सूरज कारकेरा, मोहित होन्नेनहल्ली शशिकुमार, प्रिन्सदीप सिंग. रक्षक (डिफेंडर्स) : अमित रोहिदास, जर्मनप्रीत सिंग, संजय, हरमनप्रीत सिंग, जुगराज सिंग, सुमित, पुवन्ना चंदुरा बोबी, यशदीप सिवाच, नीलम संजीव खेस, अमनदीप लाक्रा. मध्यरक्षक (मिडफील्डर्स) : राजिंदर सिंग, मनमीत सिंग, हार्दिक सिंग, मोइरांगथेम रबिचंद्र सिंग, विवेक सागर प्रसाद, विष्णू कांत सिंग, राज कुमार पाल, निळकंठ शर्मा, रोसन कुजूर, मनप्रीत सिंग. आक्रमक (फॉरवर्ड्स) : अभिषेक, सुखजीत सिंग, शिलानंद लाक्रा, मनदीप सिंग, अराईजीत सिंग हुंडल, अंगद बीर सिंग, उत्तम सिंग, सेलवम कार्थी, आदित्य अर्जुन लालागे, मनिंदर सिंग, दिलप्रीत सिंग.