प्रभात वृत्तसेवा बेल्हे – आई-वडिलांचे पालन पोषण न करणार्या निमगाव सावा (ता. जुन्नर) येथील मुलाला न्यायालयाने दणका दिला असून 3 महिने करावास व 5000 रुपये दंडाची शिक्षा सुनावली आहे.या प्रकरणी नारायणगाव पोलिसांत दाखल केलेल्या गुन्ह्यावरून दोन मुलांपैकी एकावर जुन्नर न्यायालयाने तीन महिने सश्रम कारावास व पाच हजार रुपये द्रव्य दंडाची शिक्षा सुनावली आहे, अशी माहिती नारायणगाव पोलीस ठाण्याचे सहाय्यक निरीक्षक प्रवीण सपांगे यांनी दिली. लक्ष्मण विठ्ठल गाडगे (वय 49, रा. निमगाव सावा) असे शिक्षा सुनावल्याचे नाव आहे. निमगाव सावा येथील विठ्ठल बाबूराव गाडगे (वय 80) यांना लक्ष्मण व सुनील (वय 53, दोघेही रा. निमगाव सावा) ही दोन मुले आहेत. विठ्ठल हे वयोवृद्ध पत्नीसह निमगाव सावा येथेच राहत आहेत. ते स्वतःचा चरितार्थ स्वतःच करत आहेत; मात्र त्यांची दोन्ही मुले त्यांचे घर व शेतजमीन या मालमत्तेचा उपभोग घेत आहेत. असे असतानादेखील दोन्ही मुले माझा व माझ्या पत्नीचा सांभाळ करत नाहीत, अशी तक्रार त्यांनी 13 मे 2023 रोजी नारायणगाव पोलिस ठाण्यात दिली होती. या प्रकरणी नारायणगाव पोलिसांनी दोन्ही मुलांवर ज्येष्ठ नागरिकांचे पालनपोषण कल्याण कायदा 2007 चे कलम 24 प्रमाणे गुन्हा दाखल केला होता. पोलीस हवालदार एस. एम. कोकणे यांनी या गुन्ह्याचा तपास करून दोषारोपपत्र जुन्नर न्यायालयात दाखल केले होते. कोर्अ पैरवी म्हणून महिला कॉन्स्टेबल एल. ए. किर्वे यांनी काम पाहिले. या गुन्ह्यातील दोषारोपपत्र व गुन्ह्याच्या कागदपत्रांचे अवलोकन करून जुन्नर न्यायालयाचे प्रथमवर्ग न्यायदंडाधिकारी अनंत बाजड यांनी आरोपी लक्ष्मण गाडगे याला शिक्षा सुनावली आहे.
