मांढरदेव – महाराष्ट्रातील प्रसिद्ध जागृत देवस्थान असलेल्या मांढरदेव गावाने एक ऐतिहासिक पाऊल उचलले आहे. गावात अवैध दारूविक्री आणि जुगारावर कायमस्वरूपी बंदी घालण्याचा ठराव विशेष ग्रामसभेत सर्वानुमते मंजूर झाला आहे. दारूमुळे अनेक कुटुंबांचे संसार उद्ध्वस्त झाले, आरोग्य धोक्यात आले आणि आर्थिक नुकसान झाल्याची व्यथा महिलांनी मांडल्यानंतर हा निर्णय घेण्यात आला. या ठरावाला गावातील सर्व ग्रामस्थ, युवक आणि महिलांनी एकमताने पाठिंबा दिला. मांढरदेव हे राज्यभर ओळखले जाणारे पवित्र तीर्थक्षेत्र आहे. मात्र, या गावात अवैध दारूविक्री बोकाळल्याने गावाची प्रतिष्ठा धोक्यात आली होती. याविरोधात गावातील जागरूक महिलांनी गेल्या १५ दिवसांपासून आवाज उठवला होता. त्यांनी ग्रामपंचायतीकडे पत्र देऊन विशेष ग्रामसभेची मागणी केली होती. या मागणीला प्रतिसाद देत ७ एप्रिल रोजी ग्रामपंचायतीने विशेष ग्रामसभा आयोजित केली. या सभेला सरपंच सीमा मांढरे, पोलीस पाटील जयश्री मांढरे, ग्रामपंचायत सदस्य, मांढरदेव बीटचे पोलीस अंमलदार उद्धव लिंबे, तंटामुक्त समितीचे अध्यक्ष नामदेव हिरवे यांच्यासह ज्येष्ठ ग्रामस्थ धर्माजी मांढरे, मारुती मांढरे, शंकर मांढरे, सोपान मांढरे, श्रीकांत कोचळे, परशुराम मांढरे, फुलचंद मांढरे, विजय मांढरे, चंद्रकांत मांढरे आणि अनेक युवक, महिला उपस्थित होते. दारूसह जुगारावरही बंदी सभेत फक्त दारूविक्रीच नव्हे, तर बाहेरून येऊन गावात सुरू असलेल्या ‘तीन पानी’ (टायगर) जुगारावरही बंदी घालण्याचा ठराव मंजूर झाला. या जुगारामुळे गावाची बदनामी होत असल्याचे ग्रामस्थांनी नमूद केले. मांढरदेव बीटचे पोलीस अंमलदार उद्धव लिंबे यांनी या निर्णयाला पाठिंबा देत अवैध दारूविक्री आणि जुगारावर कडक कारवाईचे आश्वासन दिले. पोलीस प्रशासन या ठरावाच्या अंमलबजावणीसाठी पूर्ण सहकार्य करणार असल्याचे त्यांनी स्पष्ट केले. महिलांचा पुढाकार या संपूर्ण चळवळीत महिलांनी महत्त्वाची भूमिका बजावली. त्यांनी दारूमुळे गावातील कुटुंबांवर होणारे दुष्परिणाम ठामपणे मांडले आणि भविष्यातील संभाव्य धोके टाळण्यासाठी हा ठराव मांडला. या निर्णयामुळे मांढरदेव गाव आता दारू आणि जुगारमुक्तीकडे वाटचाल करत असून, अन्य गावांसाठीही एक प्रेरणादायी उदाहरण ठरले आहे.
