हिंगोली – महाराष्ट्राच्या राजकारणात अभूतपूर्व असा सत्तासंघर्ष जून २०२२ मध्ये पाहायला मिळाला. शिवसेनेमध्ये दोन गट पडले. सत्तासंघर्षासह शिवसेना कुणाची हा वाद सुप्रीम कोर्ट, निवडणूक आयोगात पोहोचला. काही आमदार माजी मुख्यमंत्री उद्धव ठाकरे यांच्यासोबत राहिले. तर, काही आमदारांनी एकनाथ शिंदे यांच्यासोबत जाणं पसंत केलं. या सर्व आमदारांमध्ये चर्चेत हिंगोली जिल्ह्यातील कळमुरीचे आमदार संजय बांगर हे राहिले.

संतोष बांगर हे राज्यातील सत्तांतरानंतर विधानसभा अध्यक्षांच्या निवडणुकीपर्यंत ठाकरे गटात होते. दुसऱ्या दिवशी ते शिंदे गटात दाखल झाले. सेनेच्या दोन गटांनी एकत्र यावं यासाठी जाहीरपणे आवाहन करणारे संतोष बांगर एकनाथ शिंदे यांच्या गटात दाखल झाले. राज्य पातळीवर सत्ताबदल होऊन सहा महिने झालेले आहेत. सुप्रीम कोर्टात आणि निवडणूक आयोगात सुनावणी सुरु आहे. मात्र, या राज्यपातळीवरील राजकारणाची धग गावपातळीपर्यंत पोहोचल्याचं देखील दिसून येत आहे.

कळमनुरी तालुक्यातील वारंगा मसाई येथे सध्या मसाई मातेची यात्रा सुरु आहे. कळमनुरीचे आमदार सतोष बांगर हे मसाई मातेच्या दर्शनासाठी वारंगा मसाई येथे आले होते. या ठिकाणी आमदार बांगर यांना दर्शन घेण्याला विरोध करण्यात आला. यावेळी दोन गटात तू -तू- मै-मै झाल्याचा प्रकार घडला आहे. धार्मिक कार्यक्रम असल्यानं राजकारण बाजूला ठेवत बऱ्याच वेळानंतर ग्रामस्थांनी सामोपचारानं भूमिका घेत संतोष बांगर यांना दर्शन घ्यायला विरोध नसल्याचं स्पष्ट केलं.

नेमकं काय घडलं?
कळमनुरी तालुक्यातील वारंगा मसाई येथे सध्या येथील कुलदैवत देवी मसाई मातेची यात्रा सुरू आहे. या यात्रेनिमित्त देवीच्या दर्शनासाठी आज कळमनुरी विधानसभेचे आमदार संतोष बांगर हे वारंगा मसाई येथे आले होते. माजी पंचायत समिती सदस्य अशोक करे यांनी विरोध दर्शविला. देवीची यात्रा हा आमच्या गावाती धार्मिक कार्यक्रम असून या कार्यक्रमाला राजकीय स्वरूप येऊ नये यासाठी अशोक करे यांनी त्यांना दर्शन घेऊ नये, अशी विनंती केली होती.

संतोष बांगर यांना दर्शन घेण्यासाठी केलेल्या विरोधामुळे येथील दोन गटांमध्ये तणावाचं वातावरण निर्माण झाले होते. गावकऱ्यांनी परिस्थितीचे गांभीर्य लक्षात घेऊन वातावरण शांत करण्याचा प्रयत्न केला. आमदार संतोष बांगर हे लोकप्रतिनिधी असून त्यांनी गावातील शांतता राखण्यासाठी प्रयत्न म्हणून मध्यस्थी केली असती तर तणावाचं वातावरण निर्माण झाले नसते, अशा चर्चा गावकऱ्यांमध्ये सुरु होत्या.

अखेर वादावर पडदा वारंगा मसाई गावातील ग्रामस्थांनी गावातील मसाई मातेची यात्रा हा धार्मिक कार्यक्रम असून यामध्येही कसल्याही प्रकारचं राजकारण नको म्हणत संतोष बांगर यांना दर्शन घेण्याला होणारा विरोध सामोपचारानं मिटवला. त्यानंतर आमदार संतोष बांगर यांनी मसाई मातेचं दर्शन घेतलं.